अमेरिका र इरानबीच सम्झौताको घोषणा भएसँगै एसियाली बजारमा कच्चा तेलको मूल्यमा गिरावट आएको छ। यसैबीच, अमेरिकी राष्ट्रपति डोनाल्ड ट्रम्पले यस सम्झौताअन्तर्गत महत्त्वपूर्ण समुद्री मार्ग ‘स्ट्रेट अफ हर्मुज’ (हर्मुज जलडमरूमध्य) पुनः सञ्चालनमा ल्याइने बताएका छन्।

यो घोषणापछि विश्वव्यापी तेलको मानक मानिने ‘ब्रेन्ट क्रुड’ को मूल्य ३.८ प्रतिशतले घटेर प्रतिब्यारेल ८४.०२ डलर कायम भएको छ भने अमेरिकी बजारमा कारोबार हुने तेलको मूल्य ४.१ प्रतिशतले ओरालो लाग्दै प्रतिब्यारेल ८१.४० डलर पुगेको छ। 

पाकिस्तानका प्रधानमन्त्री शहबाज सरिफले सम्झौतामा आगामी शुक्रबार, जुन १९ का दिन स्विट्जरल्यान्डमा आधिकारिक रूपमा हस्ताक्षर हुने जानकारी दिएका छन्।

त्यसपछि ट्रम्पले सामाजिक सञ्जालमा लेखेका छन्, ‘यस क्षेत्रमा तेलको निर्बाध ढुवानी पुनः सुरु हुनेछ।’ गत फेब्रुअरी २८ मा अमेरिका र इजरायलले इरानमाथि हवाई हमला सुरु गरेलगत्तै हर्मुज मार्ग व्यावहारिक रूपमा बन्द अवस्थामा थियो।

विश्वको झन्डै २० प्रतिशत तेल र तरल प्राकृतिक ग्यास (एलएनजी) को आपूर्ति सामान्यतया यही समुद्री मार्गबाट हुने गर्दछ।पछिल्ला महिनाहरूमा विश्वव्यापी ऊर्जा बजारमा तीव्र उतारचढाव देखिएको छ। युद्ध सुरु हुनुअघि ब्रेन्ट क्रुडको मूल्य प्रतिब्यारेल झन्डै ७० डलर थियो, तर द्वन्द्वका क्रममा यो मूल्य बढेर करिब १२० डलर प्रतिब्यारेलसम्म पुगेको थियो।