काठमाडौं : प्रेसमाथि अंकुश लगाउने गरी प्रेस काउन्सिल ऐन, २०४८ संशोधन गर्न बनेको अध्यादेश जारी नगर्न नेपाल पत्रकार महासंघले राष्ट्रपति रामचन्द्र पौडेलसँग आग्रह गरेको छ।  महासंघकी अध्यक्ष निर्मला शर्माको नेतृत्वमा पदाधिकारी, सल्लाहकार तथा केन्द्रीय सदस्य सम्मिलित टोलीले बिहीबार राष्ट्रपति पौडेललाई भेटेर अध्यादेशका प्रावधानले प्रेस तथा अभिव्यक्ति स्वतन्त्रतामा पार्न सक्ने असरबारे ध्यानाकर्षण 
गराएको छ।

सरकारले यही कात्तिक १९ गते प्रेस काउन्सिल अध्यादेश ल्याएको थियो। यो अध्यादेश राष्ट्रपतिले प्रमाणीकरण गरेपछि कानुनका रूपमा लागू हुनेछ। अध्यादेशले प्रेसमाथि अंकुश लगाउने बाटो खोल्ने भएकाले महासंघले राष्ट्रपतिसमक्ष यसलाई प्रमाणीकरण नगर्न अनुरोध गरेको हो। दुई–तिहाइ नजिकको सरकारले संसद्मार्फत ल्याउनुपर्ने ऐन अध्यादेशबाट ल्याउनु आफैंमा विरोधाभासपूर्ण रहेको महासंघको भनाइ छ।