आकर्षक ब्याजको लोभ देखाएर ३ करोड रुपैयाँभन्दा बढी ठगी गर्ने लालीगुँरास सहकारी संस्थाका ४ जना सञ्चालक पक्राउ परेका छन् ।

ललितपुर महानगरपालिका पुल्चोकस्थित लालीगुँरास सहकारी संस्था लिमिटेडले आकर्षक ब्याजको लोभ देखाइ सयौँ सर्वसाधारण बचतकर्ताको बचत रकम ठगी गरेको भन्ने उजुरीका आधारमा काठमाडौँ उपत्यका अपराध अनुसन्धान कार्यालयले शुक्रबार संस्थाको अध्यक्षसहित ४ जना सञ्चालकलाई पक्राउ गरेको हो ।

२०८१ असार १४ गते अध्यक्ष अमरदास श्रेष्ठसहित कोषाध्यक्ष अमृतकुमार अर्याल, सचिव एवं संस्थाका प्रमुख कार्यकारी अधिकृत (सीईओ) सुरेन्द्र भण्डारी र सदस्य कदमबाबा जोशी प्रधानलाई पक्राउ गरी आवश्यक अनुसन्धान तथा कारबाहीका लागि जिल्ला प्रहरी परिसर, ललितपुर पठाइएको अनुसन्धान कार्यालयले जनाएको छ ।

ललितपुरको पुल्चोकमा लालीगुँरास सहकारी संस्था खोली सर्वसाधारण मानिसहरूलाई आकर्षक ब्याज दिने र चाहिएको बखत जम्मा भएको रकम झिक्न पाइन्छ भनी विश्वास दिलाइ सञ्चालकहरूलाई लाभ र बचतकर्तालाई हानि पुर्‍याइ बचतकर्ताहरूको निक्षेप अपचलन गरी ठगी गरेको भन्दै पीडित बचतकर्ताहरूले २०८० चैत १ गते जिल्ला प्रहरी परिसर ललितपुरमा ठगी कसुरमा मुद्दा दर्ता गरेका थिए ।

संस्थाको सञ्चालक समिति र लेखा समिति समेत गरी ९ जना विरुद्ध पक्राउ पुर्जी जारी गर्न ललितपुर जिल्ला अदालतले २०८० चैत ३० गते उपत्यका अपराध अनुसन्धान कार्यालयलाई अनुमति दिएको थियो । तर सोही मितिदेखि लालिगुँरास सहकारीका अध्यक्षसहित अन्य सदस्य फरार थिए ।

निरन्तरको खोजी पश्चात असार १४ गते काठमाडौँको विभिन्न स्थानबाट अध्यक्षसमेत ४ जना सञ्चालक तथा व्यवस्थापकलाई पक्राउ गर्न सफल भएको सीआईबीले पत्रकार सम्मेलनमार्फत जानकारी दिएको छ ।

पक्राउ परेका अध्यक्ष तथा सञ्चालकहरूमाथि ३ करोड रुपैयाँ ठगीको आरोप छ । २२ हजार बचतकर्ता सदस्य रहेको सहकारीमा ६ अर्ब ३० करोड रुपैयाँ निक्षेप छ ।