फ्रन्टलाइन खेल । नेपालले अर्को महिला इराकसँग मैत्रीपूर्ण फुटबल खेल्ने पक्का भएको छ । अखिल नेपाल फुटबल संघ एन्फाले एसियन कपको उपाधि जितिसकेको राष्ट्र इराकसँग मे २९ मा मैत्रीपूर्ण फुटबल खेल्ने पक्का भएको बिहीबार जनाएको छ ।

तीन दिनअघि इराक फुटबल संघले नेपालसँग मैत्रीपूर्ण फुटबल खेल्नेबारे समाचार सार्वजनिक गरेको थियो । तर एन्फाले भने मैत्रीपूर्ण खेल खेल्ने अन्तिम निर्णय हुन बाँकी रहेको र त्यसको गृहकार्य भइरहेको जनाएको थियो । बिहीबार एन्फाले मैत्रीपूर्ण खेल खेल्ने पक्का भएको जनाएको हो ।

खेल मे २९ तारिखमा बास्रा इन्टरनेशनल स्टेडियममा हुनेछ । नेपालको नयाँ प्रशिक्षक अब्दुल्लाह अलमुताइरीको यो पहिलो खेल हुनेछ ।

विश्वकप र एसिया कप छनोटका लागि तयारी गरिरहेको इराकले त्यसैका लागि नेपालसँग मैत्रीपूर्ण खेल खेल्न प्रस्ताव गरेको थियो । फिफा बरियतामा इराक ६८औं स्थानमा र नेपाल १७१औं स्थानमा छ ।

विश्वकप छनोटको समूह ‘सी’मा रहेको इराक ५ खेलबाट ३ जित २ बराबरीसहित ११ अंक जोड्दै समूहको शीर्ष स्थानमा छ । सोही समूहमा इरान, बहराइन, हङकङ र कम्बोडिया छन् ।

यस्तै समूह ‘बी’ मा रहेको नेपाल १ जित र ४ हारको नतिजासहित चौथो स्थानमा छ । नेपाल रहेको समूहमा अष्ट्रेलिया, जोर्डन, कुवेत र चाइनिज ताइपेई छन् । नेपालले छनोटमा तीन खेल खेल्न बाँकी छ । नेपालले अब चाइनिज ताइपेई, अष्ट्रेलिया र जोर्डनसँग खेल्ने बाँकी छ ।

एसियाली फुटबल महासंघ एएफसीले बाँकी खेलहरु मे ३१ देखि जुन १५ सम्म न्युट्रल भेन्यूमा गर्न प्रस्ताव गरेपछि नेपाल रहेको समूहको खेल कुवेतमा गर्ने पछिल्लो निर्णय भएको छ ।