समाचार सारांश

• सरकारले हमासद्वारा बन्दी बनाइएका नेपाली नागरिक विपिन जोशीको अवस्था अज्ञात रहेको जनाएको छ।
• परराष्ट्रमन्त्री डा. आरजु राणा देउवाले जोशीको रिहाइका लागि सरकारले प्रयास गरिरहेको बताइन्, प्रधानमन्त्रीले इजिप्टका राष्ट्रपतिलाई फोन गरेका छन्।
• जोशी दुई वर्षअघि इजरायलमा अध्ययनका लागि गएका बेला हमासको आक्रमणमा परेका थिए र त्यसयता उनको अवस्था अज्ञात छ।

काठमाडौँ । सरकारले प्यालेस्टाइनको हमास समूहले बन्दी बनाएर राखेको भनिएका नेपाली नागरिक विपिन जोशीको अवस्था अहिलेसम्म अज्ञात रहेको जानकारी दिएको छ । 

सोमबारको प्रतिनिधिसभा बैठकमा आगामी आर्थिक वर्षको बजेटबारे मन्त्रालयगत छलफलमा सांसदहरूले उठाएका प्रश्नको जवाफ दिने क्रममा परराष्ट्रमन्त्री डा. आरजु राणा देउवाले जोशीको अवस्था अहिलेसम्म अज्ञात रहेको जानकारी गराएकी हुन् । राणाले सरकार उनको रिहाइका लागि प्रयासरत रहेको समेत सदनलाई जानकारी गराइन् । 

‘विपिन जोशीको रिहाइका लागि हामीले सक्दो प्रयास गरेका छौँ । सम्माननीय प्रधानमन्त्री स्वयंले इजिप्टका राष्ट्रपतिलाई फोनमार्फत अपिल गर्नुभएको छ । सभामुख देवराज घिमिरेले अरब संसद्का अध्यक्षलाई सम्बोधन गर्दै पत्र लेख्नुभएको छ’, उनले भनिन्, ‘म स्वयंले कतार संयुक्त अरब इमिरेट्सका परराष्ट्र राज्यमन्त्रीहरू, एजिप्ट टर्की र इरानका परराष्ट्रमन्त्रीहरू पत्र लेखी अनुरोध गरेँ । 

परराष्ट्रमन्त्रीले ११ बुँदामा दिइन् सांसद्का प्रश्नको जवाफ (पूर्णपाठ)

ओमानमा आयोजित इन्डियन ओसियन कन्फ्रेन्समा कतार र संयुक्त अरब इमिरेट्सका राज्यमन्त्री र इरानका समकक्षीसँग भेट गरेर अनुरोध गरेको गरेको पनि उनले बताइन् । 

उनले भनिन्, ‘अहिलेसम्म उहाँको स्थिति पत्ता लागेको छैन । हामीले भगवानसँग प्रार्थना गरौँ नेपालका छोरा विपिन जोशी सकुशल छन् । कुनै दिन नेपाल फर्किनेछन् भन्ने आशामा छौँ ।’

उनले जोशीको खोजीमा हार मान्न नहुने बताइन् । सरकारले जतिसक्यो अन्तर्राष्ट्रिय फोरममा यो कुरा उठाउँदै आएको उनको भनाइ थियो ।

हमास समूहले इजरायलमा गरेको आक्रमणका बेला झन्डै दुई वर्षअघि त्यहाँ अध्ययनका लागि पुगेका जोशी अपहरणमा परेका थिए । त्यसयता उनको अवस्था अज्ञात रहँदै आएको छ । 

#विपिन जोशी #हमास #नेपाल