नेपाल मौसम विज्ञान विभागअन्तर्गतको मौसम पूर्वानुमान महाशाखाका अनुसार हाल देशभर मनसुनी वायुका साथै पश्चिमी वायुको पनि आंशिक प्रभाव छ। साथै न्यूनचापीय क्षेत्र बंगालको खाडीको मध्य-पश्चिम भूभाग आसपास छ र उक्त प्रणाली आगामी दिनमा थप शक्तिशाली बन्दै ‘बलियो न्यूनचापीय क्षेत्र’) का रूपमा पश्चिम-उत्तरपश्चिम दिशातिर सर्ने देखिन्छ।

जसको प्रभावले नेपालमा असोज ९ देखि ११ गतेसम्म भीषण वर्षा तथा हिमपात गराउने सम्भावना रहेको जानकारी मौसम महाशाखाले सोमबार नै विशेष बुलेटिन जारी गरेर दिइसकेको छ।

यतिबेला भने देशका हिमाली भेगमा साधारणतया बादल लागेको छ भने पहाडी र तराई क्षेत्रमा मौसम मुख्यतया सफादेखि आंशिक बदली रहेको आज (मंगलबार) बिहान ८ बजे अद्यावधिक मौसम बुलेटिनमा उल्लेख छ।

आजका लागि यस्तो छ प्रक्षेपण-

दिउँसो : देशका हिमाली र पहाडी भेगमा साधारणतया बादल तथा तराई क्षेत्रमा आंशिक बादल लाग्नेछ। कोसी, बागमती र गण्डकी प्रदेशका हिमाली र पहाडी भूभागका केही स्थानमा तथा लुम्बिनी, कर्णाली र सुदूरपश्चिम प्रदेशको हिमाली र पहाडी भूभागका थोरै स्थानमा मेघगर्जन/चट्याङसहित मध्यमसम्मको वर्षा/हिमपातको सम्भावना छ। कोसी र बागमती प्रदेशको तराई भूभागका थोरै स्थानमा, मधेस प्रदेश तथा  गण्डकी, लुम्बिनी र सुदूरपश्चिम  प्रदेशको तराई भूभागका एक-दुई स्थानमा मेघगर्जन/चट्याङसहित मध्यमसम्म वर्षाको सम्भावना छ। कोसी, बागमती, गण्डकी र लुम्बिनी प्रदेशका पहाडी भूभागका एक-दुई स्थानमा भारी वर्षाको सम्भावना छ।

राति : कोसी, मधेस र बागमती प्रदेशलगायत देशका हिमाली भेग तथा गण्डकी र लुम्बिनी प्रदेशका पहाडी क्षेत्रमा  साधारणतया बादल तथा कर्णाली र सुदूरपश्चिम प्रदेशका पहाडी भेग र बाँकी तराईमा आंशिक बादल लाग्नेछ। कोसी, बागमती र गण्डकी प्रदेशका हिमाली र पहाडी भूभागका केही स्थान तथा लुम्बिनी, कर्णाली र सुदुरपश्चिम प्रदेशका हिमाली र पहाडी भूभागका एक-दुई स्थानमा मेघगर्जन/चट्याङसहित मध्यमसम्म वर्षाको सम्भावना छ। मधेस प्रदेश तथा कोसी, बागमती र गण्डकी प्रदेशका तराई भूभागका थोरै स्थानमा तथा लुम्बिनी र सुदूरपश्चिम प्रदेशका तराई भूभागका एक-दुई स्थानमा मेघगर्जन/चट्याङसहित मध्यमसम्म वर्षाको सम्भावना छ। कोसी र बागमती प्रदेशका पहाडी भूभाग तथा मधेस प्रदेशका एक-दुई स्थानमा भारी वर्षाको सम्भावना छ।