समाचार सारांश

• नेकपा महासचिव विप्लव र माओवादी केन्द्रका अध्यक्ष प्रचण्डबीच भेटवार्ता भयो, जसमा पछिल्लो राजनीतिक अवस्था र मोर्चाबारे छलफल भयो।
• विप्लवले दुई पार्टीबीच तत्काल एकताको सम्भावना नभए पनि वामपन्थी शक्तिहरूबीच संयुक्त मोर्चा बनाएर अघि बढ्न सकिने बताए।
• भेटमा जनताका आवश्यकता र साम्राज्यवादी देशका युद्धको विरोधमा संयुक्त कार्यक्रम गर्ने प्रस्ताव गरियो।

काठमाडौँ । नेपाल कम्युनिस्ट पार्टी (नेकपा) का महासचिव नेत्रविक्रम चन्द ‘विप्लव’ र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बिच शनिबार भेटवार्ता भएको छ । महासचिव विप्लव अध्यक्ष प्रचण्डलाई भेट्न उनको निवास खुमलटार पुगेका हुन् ।

आजको भेटमा दुई नेताबिच पछिल्लो राजनीतिक अवस्था, पार्टी एकता, समाजवादी मोर्चा लगायतका विषयमा छलफल भएको विप्लवले रातोपाटीलाई जानकारी दिए । छलफलमा महासचिव विप्लवले दुई पार्टीबिच तत्काल एकताको सम्भावना नरहे पनि विभिन्न मोर्चामा सहकार्य गरेर अघि बढ्न सकिने बताएका थिए ।

‘एकताका लागि तत्काल आधार तयार नभए पनि वामपन्थी शक्तिहरू बिच संयुक्त मोर्चा बनाएर अघि बढ्न सकिन्छ,’ विप्लवले प्रचण्डलाई भनेका थिए । उनले जनताको तात्कालिक आवश्यकता तथा जनजीविका सवालमा संयुक्त कार्यक्रमहरू गर्न प्रस्ताव गरेका थिए ।

त्यस्तै, साम्राज्यवादी देशहरूले सुरु गरेको युद्धको विषयमा संयुक्त रूपमा विरोध कार्यक्रमहरू आयोजना गर्नका लागि प्रस्ताव गरिएको महासचिव विप्लवले रातोपाटीलाई जानकारी दिए । 

विप्लवले आजै नेकपा एकीकृत समाजवादीका अध्यक्ष माधव नेपालसँग भेटवार्ता गरेका छन् । यसअघि उनले शुक्रबार सो पार्टीका सम्मानित नेता झलनाथ खनालसँग छलफल गरेका थिए । छलफलमा पार्टी प्रवक्ता खड्गबहादुर विश्वकर्मा पनि सहभागी थिए ।

प्रचण्ड विप्लव राजनीति