समाचार सारांश

• काठमाडौँ महानगरपालिकाका मेयर बालेन शाह र प्रमुख प्रशासकीय अधिकृत सरोज गुरागाइँबीचको विवादका कारण बजेट समयमा आउन सकेन।
• मेयर शाह र गुरागाइँबीचको सम्बन्ध चिसिएका कारण दुई दर्जनभन्दा बढी फाइल आदानप्रदान भए पनि भेटघाट भएको छैन।
• कार्यपालिका सदस्य र नगरसभा सदस्यहरूले मेयरलाई कार्यपालिका बोलाउन दबाब दिए पनि बजेट आउने अनिश्चित छ।

काठमाडौँ । काठमाडौँ महानगरपालिकाका मेयर बालेन्द्र साह (बालेन) र प्रमुख प्रशासकीय अधिकृत सरोज गुरागाइँबिचको विवादका कारण पहिलो पटक महानगरको बजेट समयमा आउन सकेन । विवादकै कारण बालेन र गुरागाइँबिच प्रत्यक्ष भेट नभएको ६ महिना नाघिसकेको छ । 

काठमाडौँ टावरको नक्सापास विवादपछि बालेन प्रमुख प्रशासकीय अधिकृतको रूपमा  गुरागाइँलाई स्वीकार नगरेकै कारण विवाद बढेको हो । 

गुरागाइँलाई अस्वीकार गर्दै आएका बालेनले प्रमुख प्रशासकीय अधिकृतलाई नै सम्बोधन गरेर दुई दर्जनभन्दा बढी फाइल भने तोक लगाएर पठाएको खुलेको छ । यस्तै गुरागाइँले पनि त्यसैगरी मेयर बालेनलाई फाइल पठाइरहेका छन् । 

८ पुसबाट बिदामा बसेका प्रमुख प्रशासकीय अधिकृत गुरागाइँ २०८१ चैत २१ मा महानगरमा फर्केका थिए । त्यस लगत्तै गुरागाइँले चैत २९ को मितिमा मेयर बालेनलाई फाइल तोकका लागि  सिफारिस गरेको देखिन्छ ।  स्रोतका अनुसार वैशाख २६ सम्म मात्रै गुरागाइँले करिब १८ वटा फाइल स्वीकृतिका लागि मेयर बालेनकोमा पठाएका छन् । 

यस्तै बालेनले पनि कतिपय फाइलहरू ‘प्रमुख प्रशासकीय अधिकृत’ भन्दै तोक लगाएर पठाएका छन् । ‘मेयर बालेनले प्रमुख प्रशासकीय अधिकृतको लागि पठाएको फाइल बोकेर कर्मचारीहरू हिँडिरहेका छन्, कहिले गुरागाइँले स्वीकृतिको लागि पठाएको फाइल बोकेर कर्मचारी बालेनकोमा गइरहेका छन् । तर अर्काबिच बोलचाल र भेटघाट छैन,’ महानगरका एक उच्च तहका कर्मचारीले ।

यस्तै हरेक महिनाको भुक्तानीका लागि प्रमुख प्रशासकीय अधिकृतले चेकमा साइन गरिहरेका छन् । ‘मेयर साब, सचिवालयदेखि सबैको तलब उहाँकै चेकमा गइरहेको हुन्छ । तर उहाँहरूबिच इगोले गर्दा बजेट चाहिँ आउन सकेन,’ ती कर्मचारीले भने । 

यसैबिच काठमाडौँ महानगरपालिकाका कार्यपालिका सदस्य र नगरसभा सदस्यहरूले अनौपचारिक बैठक राखेरै पटकपटक मेयरलाई कार्यपालिका बोलाउन दबाब दिँदै आएका छन् ।  तर, मेयर बालेनले हरेक पटक अहिलेका प्रमुख प्रशासकीय अधिकृत गुरागाइँसँग कुनै पनि बैठकमा सहभागी नहुने अडान राख्दै आएका छन् ।  सोही कारणले देशको राजधानी रहेको महानगरपालिकाको  बजेट कहिले आउँछ भन्ने अझै अन्योल कायमै छ । 

#गुरागाइँ #बालेन शाह #काठमाडौँ महानगरपालिका