२३ कात्तिक, काठमाडौं । कोसी राजमार्गअन्तर्गत विराटनगर महानगरपालिका–३ र ४ सिमनाको ढाटमा मंगलबार साँझ दुईवटा मोटरसाइकल र कार ठोक्किँदा दुर्घटना भएको छ । उत्तरबाट दक्षिणतर्फ आउँदै गरेको प्रदेश १–०२–०४२ प १९२७ र को ७ प ८२०७ नम्बरको मोटरसाइकल एकआपसमा ठक्कर खाइ दुर्घटना भएको हो । 

दुर्घटनापछि अनियन्त्रित भएको मोटरसाइकल उत्तरतर्फ जाँदै गरेको बा ५ च २७५१ नम्बरको कारमा ठोक्किन पुगेको प्रहरीले जनाएको छ । दुर्घटनामा १९२७ नम्बरको मोटरसाइकलका चालक सुनसरीको दुहवी नगरपालिका–१० का ३५ वर्षीय रिकेशराज ढकालको मृत्यु भएको मोरङ ट्राफिक प्रमुख प्रहरी निरीक्षक राजकुमारा कार्कीले जानकारी दिए । 

उनका अनुसार गम्भीर घाइते भएका ढकालको उपचारका क्रममा मोरङको बूढीगंगास्थित विराट शिक्षण अस्पतालमा बुधबार बिहान ४:१५ बजेतिर मृत्यु भएको हो । दुर्घटनामाा उक्त मोटरसाइकलको पछाडि सवार विराटनगर–३ का २५ वर्षीय नारायण बिहानी र अर्को मोटरसाइकलमा सवार विराटनगर–४ की ४५ वर्षीया फुलोदेव गडेरी घाइते भएका छन् । 

घाइतेको विराट शिक्षणमै उपचार भइरहेको छ । घाइतेमध्ये फुलोदेवीको अवस्था गम्भीर छ । दुर्घटनालगत्तै ८२०७ नम्बरको मोटरसाइकलका चालक फरार बनेका छन् । खोजी तीव्र पारिएको प्रहरीले जनाएको छ । दुईवटै मोटरसाइकल र कार तथा चालक दुहवी–५ का ४० वर्षीय रवि कार्कीलाई नियन्त्रणमा लिएर प्रहरीले घटनाको अनुसन्धान सुरु गरेको छ ।