काठमाडौँ । नेपाल विद्युत् प्राधिकरणका कार्यकारी निर्देशक कुलमान घिसिङले ऊर्जामन्त्री दीपक खड्कासँग म्यान्डेट लिएर नेपाल–भारतबिचको विद्युत् आदान–प्रदान सम्झौता अन्तर्गत विद्युत् आयातको नयाँ दर तय गरेको दाबी गरेका छन् । 

मन्त्रालयले स्पष्टीकरण सोधेसँगै कुलमानका तर्फबाट प्रवक्ता चन्दन कुमार घोषले एक विज्ञप्ति जारी गर्दै मन्त्री खड्का र सचिव सुरेश आचार्य सोही समयमा भारत भ्रमणमा रहेकोबेला दुवै जनासँग छलफल गरी नयाँ दर तय गर्ने विषयमा म्याण्डेट लिइएको उल्लेख गरेका हुन् । 

विगतका वर्षहरूमा पनि यसरी नै दर कायम गर्ने प्रचलन तथा अभ्यास रहेको विज्ञप्तिमा उल्लेख छ । 

उक्त दर नेपाल विद्युत् प्राधिकरण सञ्चालक समितिबाट अनुमोदन र विद्युत् नियमन आयोगबाट स्वीकृति पाएपछि मात्र लागू हुने पनि विज्ञप्तिमा उल्लेख छ  । ‘सञ्चालक समिति र नियमन आयोगबाट स्वीकृत भए पश्चात अप्रिल २०२५ देखि मात्र तय गरिएको नयाँ दर लागु हुनेछ । सञ्चालक सतितिको बैठक राख्न खोज्दा विगत लामो समयदेखि बैठक बस्न सकिरहेको छैन,’ विज्ञप्तिमा दाबी गरिएको छ ।