१४ असार, विराटनगर । स्कुल बसले ठक्कर दिँदा मोरङको रंगेलीमा एक बालकको मृत्यु भएको छ । एकजना बालिका गम्भीर घाइते भएकी छन् । 

रंगेली नगरपालिका–७ स्थित माउण्टेन मकालु बोर्डिङ स्कुलको १ क ११३० नम्बरको बसले सोही बोर्डिङमा अध्ययनरत दुई बालबालिकालाई दिउँसो ४ बजेतिर ठक्कर दिएको हो ।

बसको ठक्करबाट नर्सरीमा अध्ययनरत रंगेली–५ का महादेव मण्डलका छोरा अन्दाजी ४ वर्षीय रितिक मण्डलको मृत्यु भएको मोरङ प्रहरीका प्रवक्ता डीएसपी दीपक श्रेष्ठले जानकारी दिए । 

उनका अनुसार दुर्घटनापछि गम्भीर घाइते भएका बालकलाई उपचारका लागि स्थानीय टायम्स अस्पतालमा पुर्याउनसाथ चिकित्सकले मृत घोषित गरेका हुन् । 

बसको ठक्करबाट एलकेजीमा पढ्ने रंगेली–६ का नरेश मण्डलकी छोरी अन्दाजी ६ वर्षीया सुनमकुमारी मण्डल गम्भीर घाइते भएको श्रेष्ठले बताए ।

उनलाई थप उपचारका लागि विराटनगरतर्फ ल्याइँदै छ ।  बोर्डिङ छुट्टि भएपछि घरतर्फ जाँदै गरेका बालबालिकालाई बोर्डिङअगाडि नै बसले पछाडिबाट ठक्कर दिएको प्रहरीको प्रारम्भिक अनुसन्धानबाट खुलेको छ । 

दुर्घटनापछि बसलाई प्रहरीले नियन्त्रणमा लिएको छ । फरार रहेका चालकको खोजी तीव्र पारेर घटनाको अनुसन्धान थालिएको प्रहरीले जनाएको छ ।