१५ पुस, काठमाडौं । पछिल्लो एक सातामा शेयर बजार मापक नेप्से परिसूचक ४.२७ अंकले वृद्धि भएको छ ।

गत साताको बिहीबार अन्तिम कारोबारको दिन १२.५३ अंकले बढेर २ हजार ५२०.२३ विन्दुमा नेप्से परिसूचक रोकिएको थियो । सातामा चार दिन कारोबार भएको नेप्से परिसूचक दुई दिन उकालो लागेको छ भने दुई दिनै गिरावट आएको छ ।

यसरी चार दिन भएको कारोबारमा नेप्से परिसूचक ४.२७ अंकले वृद्धि भएर २ हजार ५२४.५० विन्दुमा पुगेर रोकिएको छ ।

अघिल्लो साता १४३.४९ अंकले बढेको नेप्से परिसूचक यो साता ४.२७ अंकमा नै खुम्चिन पुगेको छ । शेयर बजारमा पछिल्लो समय निरन्तर रूपमा उतारचढाव आउन थालेको छ ।

एक दिन वृद्धि भए अर्को दिन गिरावट हुने प्रक्रिया चलिरहेको छ । बिहीबार तमु ल्होसारको अवसरमा सरकारले सार्वजनिक बिदा दिएकाले शेयर बजार बन्द भएको थियो ।

साताको पहिलो शेयर कारोबारको दिन आइतबार शेयर बजार उच्च अंकले वृद्धि भएको थियो । जुन दिन बजार ७१.२० अंकले बढेर नेप्से परिसुचक २५९१.४२ अंकमा पुगेर बजार बन्द भएको थियो । आइतबार ८६ लाख १ हजार ९ सय ५६ कित्ता सेयर किनबेच हुँदा ५ अर्ब १७ करोड ३२ लाख ५ सय ३ रूपैयाँ बराबरको शेयर कारोबार भएको थियो ।

त्यस्तै, सोमबार भने आइतबारको बजार उकालो लागेको बजारले निरन्तरता पाउन सकेन । आइतबार एक दिन उच्च अंकले बढेको नेप्से सोमबारबाट पुनः गिरावट आएको थियो ।

सोमबार बजार ६९.७७ अंकले ओरालो लागेर परिसुचक २ हजार ५२१.६५ अंकमा पुगेर बजार बन्द भएको थियो । उक्त दिन १ करोड २ लाख ९२ हजार २२६ कित्ता सेयर ५ अर्ब ६० करोड ७४ लाख ३९ हजार ६७१ रुपैयाँ बराबरको कारोबार भएको थियो ।

साताको तेस्रो दिन मंगलबार पनि शेयर बजारमा सामान्य गिरावट आएको थियो । उक्त दिन बजार २.६६ अंकले ओरालो लागेर परिसुचक २ हजार ५१८.९९ अंकमा बजार बन्द भएको थियो ।

मंगलबार शेयर कारोबार रकम घटेर ३ अर्ब १२ करोडमा सीमित भएको थियो । दुई दिन लगातार गिरावट आएको शेयर बजार मापक नेप्से परिसुचक बुधबार छिनो अंकले वृद्धि भएको थियो । 

बुधबार नेप्से परिसूचक  ५.५१ अंक बढेर २ हजार ५२४.५० विन्दुमा पुगेर बन्द भएको छ । बुधबार २२८ कम्पनीको ५६ लाख ३८ हजार कित्ता शेयर ३ अर्ब ६२ करोड ३४ लाख ८० हजार रुपैयाँ बराबरको खरिदबिक्री भएको छ ।

पछिल्लो एक सातामा नेप्से परिसूचकसँगै लगानीकर्ताको सम्पतिमा पनि सामान्य वृद्धि भएको छ । गत साता २ खर्ब २ अर्ब ६ करोड रुपैयाँ सम्पति बढेका लगानीकर्ताले यो साता २ अर्ब ३ करोड ४८ लाख रुपैयाँ सम्पति बढेको छ ।

गत बिहीबार शेयर बजारमा रहेको लगानीकर्ताको सम्पत्ति मापक बजार पूँजीकरण कुल ३५ खर्ब ४३ अर्ब ५० करोड रुर्पैयाँ रहेको थियो । यो साता २ अर्ब ३ करोड  रुपैयाँ सम्पति बढेर ३५ खर्ब ६७ अर्ब ३४ करोड रुपैयाँ कायम भएको छ ।