विराटनगर । विराटनगरमा मलामी गएका एक युवालाई शुक्रबार दिउँसो खोलाले बगाएर बेपत्ता बनाएको छ । सिंघिया खोलाले बगाउँदा विराटनगर महानगरपालिका–१० का २८ वर्षीय सुमन मण्डल बेपत्ता भएको मोरङ प्रहरीका प्रवक्ता डीएसपी दीपक श्रेष्ठले जानकारी दिए ।

उनका अनुसार मलामी गएका मण्डललाई नुहाउन पसेका बेला विराटनगर महानगरपालिका–७ स्थित सिंघियाघाटबाट खोलाले बगाएको हो । स्थानीयको सहयोगमा नेपाल र सशस्त्र प्रहरीको संयुक्त टोलीले खोजीरहेको भए पनि साँझ ५ बजेसम्म फेला पार्न नसकेको श्रेष्ठले बताए ।

यद्यपि मण्डलको खोजी जारी राखिएको उनको भनाइ छ ।