दश वर्षअघि महाभूकम्पको बेला पीडितहरुको उद्धारमा खटिएको अमेरिकी सेनाको हेलिकप्टर दुर्घटना हुँदा ज्यान गुमाएका आठ सैनिकको सम्झनामा काठमाडौंस्थित अमेरिकी दूतावासले श्रद्धाञ्जली सभा गरेको छ । 

आज छाउनीस्थित वीर स्मारकमा नेपालका लागि अमेरिकी राजदूत डीनआर थम्पसन र नेपाली सेनाका उपरथी किरण केसीले उनीहरुप्रति श्रद्धाञ्जली व्यक्त गरेका हुन् । २०७२ वैशाख १२ गते गोरखा केन्द्रबिन्दु भएर गएको ७.८ म्याग्निच्यूडको महाभूकम्पमा परेर झण्डै नौ हजार नागरिकले ज्यान गुमाएका थिए । 

भूकम्पपछि राहत र उद्धारका लागि विभिन्न देशले नेपाललाई सहयोग गरेको थियो । सोही क्रममा उद्धारका लागि खटिएको अमेरिकी सेनाको हेलिकप्टर दोलखा र सिन्धुपाल्चोकको सीमानामा पर्ने सिन्दूरे डाँडामा दुर्घटनामा परी सम्पर्कविहीन भएको थियो । सो हेलिकप्टरमा ६ अमेरिकी र दुई नेपाली सैनिक थिए । 

दूतावासले भनेको छ, ‘क्याप्टेन डस्टिन लुकासेविज, क्याप्टेन क्रिस्टोफर नग्र्रेन, सर्जेन्ट वार्ड जोनसन, सर्जेन्ट एरिक सिमन, कर्पोरल सारा मेडिना, लान्स कर्पोरल जेकब हग, मेजर तपेन्द्र रावल र वारन्ट अफिसर प्रथम बसन्त तितराले मानवताको सेवामा आफ्नो जीवन बलिदान गरे । हामी उनीहरुको विरासतलाई सधैं सम्मान सम्झिने छौं ।’