२० चैत, धनगढी । कैलालीको अत्तरियामा रहेको पद्मा अस्पतालमा उपचारका क्रममा मृत्यु भएका गोदावरी नगरपालिका–३ का ३८ वर्षीय विनोद बोहराको शव आफन्तले बुझेका छन् ।

शुक्रबार साँझ स्वास्थ्यमा समस्या देखिएपछि अस्पताल भर्ना भएका बोहराको चिकित्सकको लापरवाहीका कारण मृत्यु भएको अस्पताल तोडफोड गरेका स्थानीयले मृतकका परिवारलाई उचित क्षतिपूर्ति दिने सहमति भएपछि शनिबार शव बुझेका हुन्।

जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) वेदप्रकाश जोशीले मृतकका परिवारलाई उचित क्षतिपूर्ति दिने, प्रमुख जिल्ला अधिकारीको समन्वयमा घटनाको छानबिन गर्ने र प्रदर्शनको क्रममा घाइते भएकाहरुको उपचार गर्ने सहमतिपछि स्थानीयले विरोधका कार्यक्रम फिर्ता लिएको जानकारी दिए । डीएसपी जोशीका अनुसार आफन्तले शनिबार नै शव बुझेका हुन् ।

चिकित्सकको लापरवाहीका कारण बोहराको मृत्यु भएको भन्दै शनिबार बिहान आक्रोशित स्थानीयले पद्मा अस्पतालमा ढुङ्गामुढा प्रहार गरेपछि अस्पताल भवनका सिसा फुटेका छन् ।

अस्पतालको एम्बुलेन्स र भ्यानमा समेत क्षति पुगेको छ । उनीहरुले अत्तरियामा प्रदर्शन गर्दै सवारीसाधन समेत चल्न दिएका थिएनन् ।

सो क्रममा प्रहरीले बल प्रयोग गर्दा दुवै पक्षबीच झडप भएको थियो । झडपका क्रममा पाँच जना प्रहरीसहित ८ जना घाइते भएको जिल्ला प्रहरी कार्यालयले जनाएको छ । स्थिति नियन्त्रणमा लिन प्रहरीले १९ राउण्ड अश्रुग्याँस समेत प्रहार गरेको थियो ।