काठमाडौं । भारतले पेट्रोलियम पदार्थ निर्यातकर्ता मुलुकको संगठन (ओपेक)लाई तेलको भाउ घटाउँदै उत्पादन बढाउन आग्रह गरेको छ । मुलुकमा निरन्तर पेट्रोलियम पदार्थको भाउ बढिरहेको समयमा भारतले ओपेकसँग यस्तो आग्रह गरेको हो ।

पेट्रोलियम पदार्थ निर्यातकर्ता मुलुकले पेट्रोलियम पदार्थको भाउ बढाउन भन्दै उत्पादनमा कटौती गरिरहेका छन् । यस किसिमको कटौती चरणबद्धरुपमा हटाइनुपर्ने भारतको माग छ ।

भारतका पेट्रोलियम मन्त्री धर्मेन्द्र प्रधानले एक भर्चुअल बैठकमा ओपेकका महासचिव मोहम्मद सानुसी बारकिन्डोसँगको कुराकानीमा तेलको मूल्यको विषयमा चिन्ता व्यक्त गरेका हुन् ।

भारतको पेट्रोलियम मन्त्रालयले सार्वजनिक गरेको विज्ञप्तिमा भनिएको छ, ‘मन्त्रीले स्मार्ट अर्थतन्त्रमा सुधारको क्रममा कच्चा तेलको मूल्यको असरको बारेमा चिन्ता व्यक्त गर्नुभएको थियो र कच्चा तेलको भाउ उच्च हुँदा त्यसको असरको महँगीमा पर्ने बताउनुभएको थियो ।’

अहिले अन्तर्राष्ट्रिय बजारमा नै तेलको भाउमा उल्लेख्य वृद्धि भएको छ । सन् २०१९ को अप्रिलपछि पहिलोपटक विश्व बजारमा तेलको भाउ प्रतिब्यारेल ७५ डलर पुगेको छ । त्यसैले भारतमा पनि पेट्रोल तथा डिजेलको भाउमा उल्लेख्य वृद्धि भएको छ ।

ओपेकले सार्वजनिक गरेको विज्ञप्तिमा भनिएको छ, ‘भारतीय पेट्रोलियम मन्त्रीले आफ्नो मुलुकको तेलको खपत धेरै हुने गरेको बताएका छन् । उनले आर्थिक र सामाजिक विकासको लागि सस्तो दरमा नियमित तेल आपूर्तिको लागि आग्रह गरेका छन् ।’

भारतले ओपेक र उसका सहयोगी मुलुकलाई तेलको उत्पादन बढाउन आग्रह गर्दै आएको छ । तर, ओपेकले भने भारतको आग्रह बेवास्ता गर्दै आएको छ । यससँगै भारतले तेल आयातको लागि नयाँ विकल्प खोजिरहेको छ ।

एजेन्सीहरुको सहयोगमा