३ जेठ, जनकपुरधाम । दाइ-भाइबीचको विवादले उग्ररुप लिएपछि गोली चलेको छ।  धनुषामा भाइले दाइलाई गोली हानी घाइते बनाएका छन् ।

नगराइन नगरपालिका ८ स्थित अकौरा बस्ने जामुन पासवान र नसिब पासवानबीच घरायसी विवाद हुँदा गोली चलेको प्रहरीले जनाएको छ ।

दुबै पक्षबीच झगडाको क्रममा कुटाकुट हुँदा नसिब पक्षका ५० वर्षीय श्रीनारायण पासवानले जामुनमाथि गोली प्रहार गरेको जिल्ला प्रहरी कार्यालय धनुषाले जनाएको छ । प्रहरीका अनुसार ७१ वर्षीय जामुनको दाहिने हातको पाखुरामा गोली लागेको छ। 

अहिले उनको प्रादेशिक अस्पताल जनकपुरमा उपचार भइरहेको छ । घटनास्थलबाट प्रहरीले दुई थान नलकटुवा पेस्तोल र १२ राउण्ड गोली बरामद गरको धनुषाका प्रहरी प्रवाक्ता डीएसपी प्रदिप क्षेत्रीले जानकारी दिए । चार-पाँच वर्षदेखि दुबै पक्षबीच निरन्तर झैंझगडा हुँदै आएको उनले बताए । 

प्रहरीले घटनामा संलग्न रहेको आरोपमा छानबिनका लागि ११ जनालाई नियन्त्रणमा लिएको छ । स्थानीय ईन्द्रनारायण पासवान, अभिषेक पासवान, सोमनाथ पासवान, अजय पासवान, राजीव पासवान, धर्मेन्द्र पासवान, राजीव पासवान, प्रसादी पासवान, प्रह्लाद पासवन, विजय कुमार पासवान र राजन पासवानलाई नियन्त्रणमा लिएको प्रहरीले जनाएको छ ।