साविक विजेता अर्जेन्टिनाले कोपा अमेरिका २०२४ मा विजयी सुरुवात गरेको छ। आज बिहान मर्सिडिज बेन्ज स्टेडियममा भएको खेलमा अर्जेन्टिनाले क्यानडालाई २–० ले हराउँदै जित हात पारेको हो।

पहिलो हाफमा क्यानडाले अर्जेन्टिनालाई गोलरहित बराबरीमा रोके पनि दोस्रो हाफमा अर्जेन्टिनाले २ गोल गरेसँगै जित हात पार्न सफल भयो।

खेलको पहिलो हाफ गोलरहित बराबरी सकिएको थियो। तर, ४९औं मिनेटमा म्याक एलिस्टरको पासमा अल्भारेजले गोल गर्दै अर्जेन्टिनालाई सुरुआती अग्रता दिलाए। ८८औं मिनेटमा लिओनल मेसीको पासमा मार्टिनेजले गोल गर्दै अर्जेन्टिनालाई २-० को जित दिलाए।जितसँगै अर्जेन्टिनाले ३ अङ्क जोडेको छ।