नेपाली कांग्रेसका सांसद विनोद राईले कोशीका मुख्यमन्त्री केदार कार्कीलाई सर्वदलीय सरकार बनाउन बाटो खोलिदिन आग्रह गरेका छन् । कार्कीकै नेतृत्वमा सर्वदलीय सरकार बनाउने विकल्प रहेको उनले सुनाए ।

शुक्रबार संसद बैठकमा भएको संकल्प प्रस्ताव माथि विचार राख्ने क्रममा राईले संकल्प प्रस्ताव फिर्ता लिन विपक्ष दललाई आग्रह गरे । १६८ (५) को आधारमा सरकार बनेको र अविश्वासको प्रस्ताव पनि लिन नमिल्ने बताउँदै संकल्प प्रस्ताव फिर्ता गर्न उनले माग गरे ।

मुख्यमन्त्री कार्कीलाई आग्रह गर्दै भने, ‘सर्वदलीय सरकार बनाउन मार्ग प्रशस्त गरिदिनुस् । मुख्यमन्त्रीकै नेतृत्वमै को को मन्त्री खान चाहनुहुन्छ? आउनुस् ।’ कांग्रेसका मन्त्री हटाएर अन्य दलबाट मन्त्री बनाउन तयार रहेको उनले बताए ।

संकल्प प्रस्ताव मुलुकको गरिबी, अस्थिरता, विकासका लागि हुनुपर्ने बताउँदै राईले भने,‘कम्युनिस्ट साथीहरु शब्दमा खेल्न निक्कै माहिर हुनुहुन्छ । मुख्यमन्त्रीलाई हटाउन संकल्प प्रस्ताव भन्दा पनि यो प्रदेशको विकास, समृद्धि कसरी ल्याउन सकिन्छ भनेर संकल्प प्रस्ताव ल्याउनुभएको भए सुनमा सुगन्ध हुने थियो ।’

२७ असोजमा संविधानको धारा १६८ को उपधारा ५ अनुसार मुख्यमन्त्री बनेका केदार कार्कीलाई दिएको समर्थन २६ चैतमा एमाले र माओवादी केन्द्रले फिर्ता लिएका थिए । समर्थन फिर्ता लिँदै उनीहरूले प्रदेश सभाको अधिवेशन माग गरेका थिए ।

समर्थन फिर्ता लिएपछि अल्पमतमा परेका मुख्यमन्त्री कार्की राजीनामा नदिने र विश्वासको मत पनि नलिने अडानमा छन् । उनलाई राजीनामा नदिने भए विश्वासको मत लिन निर्देशन दिनका लागि दुई दलले संकल्प प्रस्ताव दर्ता गरेका हुन् ।