आज शनिबार इलाम क्षेत्र २ मा उपनिर्वाचन भइरहेको छ। उपनिर्वाचनमा विहान ७ बजे मतदान सुरु भएको हो ।
यो क्षेत्रका ७९ मतदानस्थल र एक सय ४९ वटै मतदान केन्द्र मतदानका लागि तयार रहेको मुख्य निर्वाचन अधिकृत केशवप्रसाद घिमिरेले बताए। ‘बिहीबार र शुक्रबार सबै मतदानस्थलमा कर्मचारी र सुरक्षाकर्मी पुगिसकेका छन्,’ उनले भने, ‘मतदानका लागि सबै केन्द्र तयार भएका छन्।’

मतदान केन्द्रमा मतदान अधिकृत, सहायक मतदान अधिकृत, दुई सहायक कर्मचारी र सहयोगी गरी पाँच कर्मचारी खटाइएका छन्। उनीहरूले स्थानीय सर्वदलीय बैठक गरी मतदानको तयारी गरेको मुख्य निर्वाचन अधिकृतको कार्यालयले जनाएको छ।