२३ असार, काठमाडौं । अन्तर्राष्ट्रिय बजारमा कच्चा तेलको भाउ ओरालो लागेको छ । बिहीबार ब्रेन्ट कच्चा तेलको मूल्य प्रतिब्यारेल १०१ डलरमा झरेको छ । गत जेठ १७ गते प्रतिब्यारेल १२४ डलर पुगेको थियो । त्यस्तै डब्लूटीआई तेलको मूल्य प्रतिब्यारेल ९८ डलरमा झरेको छ ।

कच्चा तेलको मागमा सुस्तता आएसँगै भाउ घट्न थालेको हो । हालै अमेरिकी बहुराष्ट्रिय लगानी बैंक सिटी ग्रुपको एक रिपोर्टले २०२२ को अन्त्यसम्म कच्चा तेलको भाउ घटेर प्रतिब्यारेल ६५ डलरसम्म आउन सक्ने चेतावनी दिएको छ ।

तेल उत्पादक संघ ओपेकको हस्तक्षेप नहुनु र लगानीमा आकर्षण घट्नुले मूल्यमा कमी आउने सो ग्रुपको चेतावनीले यतिबेला विश्व तेल बजारमा तरंग पैदा गरेको छ ।

रुसले युक्रेनमा आक्रमण गरेसँगै यूरोपियन मुलुकहरुले रुसबाट तेल आपूर्तिमा प्रतिबन्ध लगाएपछि तेलको मूल्य अकस्मात बढेको थियो । पछिल्लो समय चीन, भारत लगायत मुलुकले रुसबाट सस्तो दरमा तेलको माग बढाएका छन् ।

कच्चा तेलको मूल्यले अप्रत्यक्ष रुपमा नेपालीको भान्सासम्म प्रभाव पार्दछ । नेपाल आयल निगम (एनओसी)ले भारतीय आयल कर्पोरेसन (आईओसी)बाट तेल खरिद गर्दै आएको छ ।

आईओसीले प्रशोधन खर्च र कच्चा तेलको मूल्यअनुसार नेपाललाई प्रत्येक १५–१५ दिनमा नयाँ मूल्य सूची पठाउँछ । त्यही मूल्यसूचीका आधारमा एनओसीले नेपालमा पेट्रोलियम पदार्थको मूल्य घटबढ गराउँछ ।

पेट्रोलियम पदार्थको मूल्य बढ्दा ढुवानी खर्च समेत बढ्न गई दैनिक उपभोग्य वस्तुको भाउ समेत बढ्न जान्छ । पेट्रोलियम पदार्थको मूल्यकै कारण हाल नेपालसहित कतिपय मुलुकमा मूल्यवृद्धि चुलिएको छ ।

सिटी ग्रुपको प्रक्षेपण रिपोर्टअनुसार कच्चा तेलको मूल्य घटेमा समग्र देशको मूल्यवृद्धि नियन्त्रणमै दवाब पुग्नेछ ।