दाङ । दाङमा ज्वाइँलाई छोरा भनेर नागरिकताको प्रमाणपत्र दिन किर्ते काम गरेको आरोपमा तीन जना पक्राउ परेका छन् ।

किर्ते नागरिकताको प्रमाणपत्र बनाएको आरोपमा दाङ देउखुरीको राजपुर गाउँपालिका – ७ का वडाध्यक्ष सहित तीनजना पक्राउ परेका हुन् ।

पक्राउ पर्नेमा वडा अध्यक्ष भीमबहादुर खड्कासहित त्यही वडाका भीमबहादुर कामी र उनकी छोरी सुशीला विक रहेका छन् ।

भीमबहादुर कामीले ज्वाइँ अर्जुन बिकलाई छोरा बनाएर नागरिकता दिएको र वडाले पनि सिफारिस गरेको भन्दै पक्राउ गरिएको प्रहरीले जनाएको छ ।

तर, नागरिकता बनाउँदा अर्जुनको नाम लिलाराम बिक राखिएको छ ।

अर्जुन सुशीलाका श्रीमान् हुन् । उनी हाल बैदेशिक रोजगारीको सिलसिलामा विदेशमा छन् ।

नागरिकता २०७५ साल असोज ४ गते इलाका प्रशासन कार्यालय लमहीबाट जारी भएको थियो ।

नागरिकतामा ईलाका प्रशासन कार्यालय लमहीका प्रमुख प्रेमबहादुर खवासको हस्ताक्षर छ ।

यस कार्यमा भीमबहादुरकी छोरी सुशीला मुख्य मतियारको रुपमा संलग्न भएको पाइएको प्रहरीले जनाएको छ ।