इन्टरनेटका धेरै वेबसाइट सञ्चालनमा प्रयोग हुने पीएचपी प्रोग्रामिङ भाषामा गम्भीर सुरक्षा कमजोरी फेला परेको सार्वजनिक भएपछि विश्वभर साइबर आक्रमणको प्रयास तीव्र भएको छ । सुरक्षा कमजोरी सार्वजनिक भएसँगै क्लाउड सेवा प्रदायकहरूले लाखौँ ह्याकिङ प्रयास देखिएको बताएका छन् । यसपछि विभिन्न देशका सरकार र कम्पनीहरू सुरक्षा अपडेट गर्न तथा जोखिम कम गर्न सक्रिय भएका छन् ।

रोयटर्सका अनुसार बुधबार युरोपसहित विभिन्न क्षेत्रका सरकारी निकायले सावधानीस्वरूप वेबसाइट तथा अनलाइन सेवा बन्द गरेका थिए । जापानदेखि फिनल्यान्डसम्म बैंकिङ, विमान सेवा, रेल, कर प्रशासन र सरकारी सेवामा अस्थायी अवरोध गरिएको थियो ।

क्लाउडफ्लेयरका प्रमुख कार्यकारी म्याथ्यु प्रिन्सले सुरक्षा कमजोरी सार्वजनिक हुनुअघि नै आफ्नो नेटवर्कमा हजारौँ आक्रमण प्रयास देखिएको बताएका छन् । उनका अनुसार कमजोरी सार्वजनिक भएको ४५ मिनेटभित्रै यस्तो प्रयासको संख्या दशौँ हजार पुगेको थियो । दुई घण्टाभित्र लाखौँ र त्यसपछि लाखौँभन्दा बढी प्रयास रेकर्ड भएका थिए । अमेजनले पनि व्यापक रूपमा सुरक्षा कमजोरीको दुरुपयोग गर्ने प्रयास भएको जनाएको छ ।

पीएचपी विकासकर्ताहरूले बुधबार नै कमजोरी समाधान गर्ने नयाँ संस्करण सार्वजनिक गर्दै प्रयोगकर्तालाई तत्काल अपडेट गर्न आग्रह गरेका थिए । एआईको प्रयोगबाट वर्षौँदेखि सफ्टवेयरमा रहेका कमजोरी पत्ता लागेको समाचारमा उल्लेख छ ।

माइक्रोसफ्टका प्रमुख कार्यकारी सत्य नाडेलाले जर्मनीमा आयोजित एक कार्यक्रममा यस्तो घटना लामो समयदेखि नदेखेको बताए । उनले जटिल बन्दै गएका सफ्टवेयर प्रणालीलाई सुरक्षित रूपमा सञ्चालन र अद्यावधिक गर्न सकिने गरी विकास गर्नु आवश्यक रहेको बताए ।

जापानमा नोमुरा, मित्सुबिसी यूएफजे फाइनान्सियल ग्रुप, एएनए विमान सेवा र इस्ट जापान रेलवेले केही अनलाइन सेवा अस्थायी रूपमा रोकेका थिए । जापानको अर्थ मन्त्रालय, मौसम विज्ञान निकाय र राष्ट्रिय कर एजेन्सीले पनि सुरक्षा उपायस्वरूप केही अनलाइन सेवा बन्द गरेका थिए ।

फ्रान्सेली दूरसञ्चार कम्पनी ओरेन्जले आफ्ना केही सहायक कम्पनीअन्तर्गतका पीएचपीमा आधारित वेबसाइट र एप्लिकेसनमा पहुँच अस्थायी रूपमा रोकेको थियो । फिनल्यान्डको सरकारी सूचना प्रविधि सेवा प्रदायक भाल्टोरीले सुरक्षा अपडेट लागू गरेपछि सरकारी अनलाइन सेवा क्रमशः पुनः सञ्चालन गर्ने जनाएको छ । सेवा पूर्ण रूपमा सञ्चालनमा आउन केही दिनदेखि केही हप्तासम्म लाग्न सक्ने उसको भनाइ छ ।

चीनको उद्योग मन्त्रालयले पनि सरकारी निकाय, संस्था र प्रयोगकर्तालाई आफ्ना प्रणाली जाँच गर्न तथा पीएचपीको सुरक्षित संस्करणमा अद्यावधिक गर्न आग्रह गरेको छ । दक्षिण कोरियाले निजी क्षेत्रको साइबर सुरक्षा सतर्कता स्तर बढाउँदै आपत्कालीन प्रतिकार्यका उपाय सक्रिय गरेको छ ।

साइबर सुरक्षा विज्ञहरूका अनुसार नयाँ संस्करणमा अपडेट गर्न सजिलो भएका प्रणालीमा जोखिम छिटो कम गर्न सकिन्छ । तर पुरानो पीएचपी संस्करणमा चलिरहेका वेबसाइट, जटिल सूचना प्रविधि प्रणाली र सीमित प्राविधिक स्रोत भएका संस्थालाई सुरक्षा सुधार गर्न बढी समय लाग्न सक्छ । कतिपय पुराना संस्करणमा सुरक्षा अपडेट उपलब्ध नभएकाले सम्पूर्ण प्रणाली नै अद्यावधिक गर्नुपर्ने अवस्था आउन सक्छ ।

फिनल्यान्डका अधिकारीहरूले भने आफ्ना अनलाइन सेवा बन्द गर्नुपर्नुको कारण सुरक्षा जोखिमप्रतिको सावधानी भएको र उक्त कमजोरीको दुरुपयोगबाट सेवा अवरुद्ध भएको प्रमाण नभेटिएको बताएका छन् । विश्वभरका निकायले सुरक्षा कमजोरीको वास्तविक प्रभाव र सम्भावित क्षतिको मूल्यांकन गरिरहेका छन् ।