१८ पुस, काठमाडौं । त्रिभुवन विमानस्थलबाट सौर्य एयरलाइन्समा असिस्टेन्टको रुपमा कार्यरत रेखा शाक्य पोखरेल स्रोत नखुलेको ५० लाख नगदसहित पक्राउ परेकी छन् ।

गोप्य सूचनाको आधारमा सादा पोसाकमा खटिएका प्रहरीले उनीलाई पक्राउ गरेको हो ।

शनिबार दिउँसो विराटनगरबाट काठमाडौं आएको जहाजमा प्रहरीले चेकजाँच गर्दा १ हजार दरका ४९५० वटा र ५०० दरका १०० वटा गरी जम्मा ५० लाख नगद बरामद गरेको थियो ।

प्रहरीले रातो रंगको ब्यागभित्र लुकाई छिपाई राखेको नगद बरामद भएको थियो ।

करेन्ट चाउचाउ लेखिएको कार्टुनभित्रको सो रकम भन्सार उद्‍घोष नभएको प्रहरीको भनाइ छ ।

उक्त रकम संकलन गर्न आउने पोखरेललाई आवश्यक अनुसन्धान एवं कारबाहीको लागि राजश्व अनुसन्धान विभाग, हरिहर भवन पठाइएको विमानस्थल प्रहरीले जनाएको छ ।