अघिल्लो वर्षको तुलनामा आगलागी घट्यो, वन डढेलो बढ्यो

काठमाडौँ । राष्ट्रिय विपद् जोखिम न्यूनीकरण तथा व्यवस्थापन प्राधिकरणको पछिल्लो विवरण हेर्ने हो भने नेपालमा २४ घण्टामा ७२ वटा आगलागी तथा वन डढेलोका घटना भएका छन् । 

प्राधिकरणका अनुसार मंगलबार बिहान १० बजेदेखि बुधबार बिहान १० बजेसम्मको तथ्याङ्कमा ४८ जिल्लामा आगलागी तथा वन डढेलोको घटना देखिन्छ ।

यसमध्ये २५ जिल्लामा ३४ वटा आगलागीका घटना भएको र २३ जिल्लामा ३८ वटा वन डढेलोका घटना भएका छन् ।

ती घटनामा ४ जना घाइते भएको प्राधिकरणले जनाएको छ । यसैगरी पछिल्लो चार दिनमा २७२ वटा वन डढेलो र आगलागीका घटना भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणको वन डढेलो आगलागी तथा वातावरण शाखाका उपसचिव सुदिप छत्कुली बताउँछन् । 

उनका अनुसार यी घटनामा दुई जनाको मृत्यु भएको छ । यसैगरी आगलागीबाट २२ जना घाइते भएका छन् । 

यसैबिच ३० वटा भौतिक संरचनाको क्षति भएको छ भने २६ चौपाया आगलागीबाट मरेका छन् । 

• साउन यता २५ सयभन्दा बढी आगलागी 

साउन यता देशभर २५ सयभन्दा बढी आगलागी र वन डढेलोका घटना प्रकाशमा आएको छ । चालु आर्थिक वर्ष २०८०/८१ साउनदेखि यताको तथ्याङ्क आधार मान्ने हो भने २ हजार ५०६ वटा वन डढेलो र आगलागीका घटना भएका छन् । यसमध्ये २ हजार १३८ वटा आगलागी र ३६८ वटा वन डढेलोका घटना छन् । 

ती घटनाबाट ४९ जनाको मृत्यु हुनका साथै ३३० जना घाइते भएका छन् । यस्तै, ४१७ वटा भौतिक संरचनामा क्षति भएको छ । १ हजार ३७ वटा चौपाया जलेर नष्ट भएको तथ्याङ्क छ ।

यस अवधिमा सबैभन्दा धेरै कोशी प्रदेशमा आगलागीका घटना भएका छन् । कोशी प्रदेशमा ९९२, मधेसमा ६०९, बागमतीमा ४९२, लुम्बिनीमा ३६५ र अन्य प्रदेशमा ४८ वटा आगलागीका घटना भएका छन् । 

गत वर्षको यही ६ महिनामा २ हजार ५१३ वटा कुल आगलागी र वन डढेलोका घटना भएको थियो । यसमध्ये २ हजार २६० आगलागीका घटना भएको थियो भने वन डढेलोका घटना २५३ वटा थियो । ती घटनामा ८३ जनाको मृत्यु भएको थियो । 

• वन डढेलोको घटना बढ्यो

अघिल्लो वर्ष वर्षको तुलनामा आगलागीको घटना थोरै घटेको देखिन्छ । यस्तै वन डढेलो गत वर्षको तुलनामा बढेको देखिन्छ । यसवर्ष आगलागीका घटना २ हजार १३८ वटा रहेका छन् भने ३६८ वटा वन डढेलोका घटना भएका छन् । 

गत वर्ष समीक्षा अवधिमा २ हजार २६० आगलागी र २५३ वटा वन डढेलोको घटना भएको तथ्याङ्क छ ।

यसअनुसार गत वर्षको तुलनामा आगलागीका घटना थोरै मात्रामा घटेको प्राधिकरणका वन डढेलो आगलागी तथा वातावरण शाखाका उपसचिव सुदिप छत्कुली बताउँछन् । उनले भने, ‘समग्रमा वन डढेलोको घटना यो वर्ष अलि बढी भएको देखिन्छ भने आगलागीका घटना थोरै घटेको देखिन्छ ।’

#डढेलो #आगलागी