फ्रन्टलाइन खेल । विश्वप्रसिद्ध फुटबलर जर्मनी तथा बायर्न म्युनिखका सफल स्ट्राइकर गर्ड मुलरको निधन भएको छ । मुलरको आइतबार ७५ वर्षको उमेरमा निधन भएको हो । बायर्नले लेजेण्ड मुलरको निधन भएको पुष्टि गरेको छ । मुलरले बायर्नका लागि ४ सय २७ बुन्डेसलिगा खेलमा कीर्तिमानी ३ सय ६५ गोल गरेका थिए । उनले युरोपियन खेलमा ७४ खेलमा ६६ गोल गरेका थिए ।

विश्वकप विजेता मुलरले वेस्ट जर्मनीका लागि ६२ खेलमा ६८ गोल गरेका थिए । वेस्ट जर्मनीले १९७४ को विश्वकप जित्दा मुलरले निर्णयक गोल गरेका थिए । यस्तै १९७२ मा युरोकप जित्दा उनी टिममा रहेका थिए । एक पटकको बालोन डी’ओर विजेता मुलरले क्लब फुटबलमा बायर्नका लागि सबै उपाधि जितेका थिए ।