१६ पुस, सिन्धुपाल्चोक । जिल्लाकै दुर्गम जुगल गाउँपालिकाको दिपु र तेगा जोड्ने तेगाको पुल तर्न खोज्दा खसेर दिपु गाउँकै आमा-छोरी बेपत्ता भएका छन् ।

अझैसम्म सडक नजोडिएको जुगल गापाको दिपु र तेगा जोड्ने एउटै मात्र सम्पर्क झोलुंगे पुल गत असार १ मा ब्रम्हायाणीमा आएको बाढीले बगाएको थियो ।

त्यसयता काठको पुल हालेर स्थानीय आउजाउ गरिरहेका थिए । जिल्ला प्रहरी नायब उपरीक्षक दक्षबहादुर बस्नेतका अनुसार बेपत्ता हुने आमा-छोरी जुगल गापा ३ की २० वर्षीया पासाङल्हामु शेर्पासहित नौ महिनाकी डोल्माछिरिङ हुन् ।

बिहीबार छोरी च्यापेर घरबाट बिदा लिई माइती तेम्बाथान् हिँडेकी पासाङल्हामु शुक्रबारसम्म माइती नपुगेको खबर पाएपछि परिवार र आफन्तले सुरक्षाकर्मीलाई खबर गरेका थिए ।

सडक नजोडिएको जुगल गापाको तेम्बाथानभन्दा पल्लो गाउँ दिपु तेगा पुग्न पैदल तीन दिन लाग्छ । ‘टाढा भएकाले पैदल हिँडेर प्रहरीलाई पुग्न धेरै समय लाग्यो , आहिले बेपत्ता आमाछोरी दुवैको शंकास्पद स्थानमा तीव्र खोजी भइरहेको छ,’ उपरीक्षक बस्नेतले बताए ।

शव फेला नपरे पनि ब्रम्हायाणी नदी क्षेत्रमा तेगा पुलभन्दा चार सय मिटर तल आमाको कम्बल र छोरीको कपडा फेला परेकाले नदीले बगाएको हुनसक्ने प्रारम्भीक अनुसन्धानबाट खुलेको छ।

यसअघि जुगल गापा वडा ३ तेम्बाथान गाउँ जोड्ने चुडिएको पुल तर्न खोज्दा तेम्बाथान गाउँकै ४० वर्षीय छिमिग्याम्जो लामा (टाउके) नेशमखोलामा खसेर बेपत्ता भएका थिए ।

उनको झोला मात्रै भेटिएको थियो । यो घटनालगत्तै नेशम खोला जीर्ण पुलबाट आउजाउ गर्नुपर्ने बाध्यता टार्न माओवादी केन्द्रका नेता तथा कार्यकर्तासहित अन्य समाजसेवीले चन्दा संकलन गरेर तुइन हालेका थिए ।

यसरी हरेक वर्ष पुलबाट खसेर बेपत्ता हुने समस्या समाधान गर्नुपर्ने भन्दै स्थानीयहरूले गुनासो गरेका छन् ।

जुगल गापा ३ तेम्बाथान्का अगुवा साइला शेर्पाका अनुसार सभामुख, मन्त्रीसहित थुप्रै जनप्रतिनिधि यही जिल्लाका भए पनि दुर्गम क्षेत्रलाई वास्ता नगरेको उनले गुनासो गरे ।