३ मंसिर, गुलरिया । बर्दियाको राजापुर स्थित कर्णाली नदीको तटबन्धन सडकमा गुडिरहेको ट्रयाक्टर पल्टिंदा चालकको मृत्यु भएको छ ।

राजापुर नगरपालिका वडा नम्बर ३ का १९ वर्षीय किशोर थारुको ट्रयाक्टरमा च्यापिएर मृत्यु भएको हो।

कर्णाली नदीको तटबन्धन मार्ग हुँदै अनन्तपुर जाने क्रममा भे २ त १००० नम्बरको आफैंले चलाएको ट्रयाक्टर पल्टिएर च्यापिएपछि चालकको घटनास्थलमै मृत्यु भएको जिल्ला प्रहरी कार्यालय बर्दियाका प्रहरी नायव उपरीक्षक हिक्मत बहादुर बोहोराले जानकारी दिए । 

ट्रयाक्टर अनियन्त्रित भइ पल्टिएको हुन सक्ने प्रहरीको प्रारम्भिक अनुमान छ । मृतकको पोस्टमार्टम र घटनाको विस्तृत अनुसन्धान भैरहेको उनले बताए।