रौतहट , पुष -११

गौर–९ सिर्सियामा अवस्थित श्री रत्नकन्या आधारभूत विद्यालयमा नयाँ प्रधानाध्यापक भैरो यादवको आगमनसँगै विद्यालयको शैक्षिक वातावरणमा उल्लेखनीय सुधार आएको छ। विद्यालयमा दैनिक रूपमा पठनपाठनमा थप सक्रियता देखिन थालेको छ।

यादवले पदभार ग्रहण गरेसँगै विद्यालयमा अनुशासन, समयपालन, र पठनपाठनको स्तर उकास्नका लागि विभिन्न पहल गरेका छन्। विद्यार्थीहरूले बिहानको प्रार्थना कार्यक्रमदेखि नै अनुशासन पालन गर्दै दिनभरि अध्ययनमा ध्यान दिन थालेका छन्।

विद्यालय परिसर सफा र व्यवस्थित बनाइएको छ। शिक्षकहरूको नियमित उपस्थिति सुनिश्चित भएको र विद्यार्थीहरूको हाजिरीमा पनि सकारात्मक परिवर्तन आएको स्थानीय अभिभावकहरू बताउँछन्।

शैक्षिक सुधारसँगै यादवले अतिरिक्त क्रियाकलापहरूलाई समेत प्राथमिकता दिएका छन्। विद्यार्थीहरूको प्रतिभा विकासका लागि विभिन्न प्रतियोगिताहरू आयोजना गर्दै आएको विद्यालयले आफ्नो नाम थप उचाइमा पुर्‍याएको छ।

स्थानीय समुदायले प्रधानाध्यापक यादवको प्रशंसा गर्दै विद्यालयको प्रगतिको लागि सहयोग गर्ने प्रतिबद्धता व्यक्त गरेका छन्। विद्यालय व्यवस्थापन समिति तथा अभिभावकहरूको सहभागितामा विद्यालयमा सुधारका थप कदम चाँडै सुरु हुने अपेक्षा छ।