२८ फागुन, काठमाडौं । काठमाडौं उपत्यकाको वायु प्रदूषण अति अस्वस्थ स्तरमा पुगेको छ । लामो समयदेखि पानी नपरेको र हावा पनि नचलेकोले प्रदूषणको मात्रा बढेको हो ।

वातावरण विभागका अनुसार आज बिहान दाङको देउखुरी क्षेत्रको वायुको गुणस्तर सबैभन्दा खराब छ । त्यहाँको वायुको गुणस्तर १९२ एक्यूआई मापन भएको छ । त्यसपपछि कैलालीको धनगढी, भक्तपुर, काठमाडौंको शंखपार्क र रत्नपार्क तथा ललितपुरको खुमलटार, भैंसेपाटी क्षेत्रको हावा अति अस्वस्थकर तहमा पुगेको छ ।

यसैगरी चितवनको भरतपुर र धनकुटाको वायुको गुणस्तर पनि अति खराब स्तरमा छ । अहिले काभ्रेको धुलिखेल, इलाम र बाँकेको नेपालगञ्ज क्षेत्रको हावाको गुणस्तर पनि खराब स्तरमा रहेको विभागको वेबसाइटमा देखिन्छ ।

हिजो बेलुका ललितपुरको लगनखेल क्षेत्रको एक्यूआई २०० सम्म नाघेको थियो । पानी नपरेसम्म वा बेस्सरी हावा नचलेसम्म धूलो र धुवाँका कण वायुमण्डलमा कायमै रहने भएकाले केही दिन यस्तो अवस्था कायमै रहनेसम्भावना छ । किनभने मौसमविदहरुका अनुसार तत्काल पानी पर्ने सम्भावना छैन ।

आज पनि बादल लाग्ने तर पानी पर्ने सम्भावना कम छ । तर चैत १ गते काठमाडौं लगायत देशको मध्य पहाडी भूभाग र उच्च  हिमाली क्षेत्रमा हावा चल्ने सम्भावना भएकाले प्रदूषण केही घट्ने अनुमान छ ।