समाचार सारांश

• रुसले युक्रेनको ड्रोन आक्रमणका कारण सोचीको तेल डिपोमा आगलागी भएको जनाएको छ।
• युक्रेनको दक्षिणी सहर खेरसोनमा रुसी आक्रमण हुँदा एक जनाको मृत्यु र केही घाइते भएका छन्।
• रुस र युक्रेन दुवैले एकअर्काको क्षेत्रमा ड्रोन आक्रमण गरेको दाबी गरेका छन्।

सोची । रुसको कृष्ण सागर किनारमा रहेको पर्यटकीय सहर सोची नजिक रहेको एक ठूलो तेल डिपोमा भीषण आगलागी भएको छ। उक्त आगलागी युक्रेनी ड्रोन आक्रमणका कारण भएको रुसले दाबी गरेको छ।

क्रास्नोडार क्षेत्रका गभर्नर भेनीयामिन कोन्द्रातयेभका अनुसार, ड्रोनको भग्नावशेषले इन्धन ट्याङ्कमा ठोक्किएर आगलागी भएको हो। आइतबार बिहान लागेको आगो निभाउन १२७ जना दमकलकर्मी परिचालन गरिएको थियो, जुन पछि नियन्त्रणमा लिइएको बताइएको छ। आगलागीका कारण सोचीस्थित विमानस्थल केही समयका लागि उडानहरु स्थगित गरेको थियो।

त्यसैबिच, रुसले युक्रेनको दक्षिणी सहर खेरसोनमा रहेको एउटा प्रमुख पुलमाथि पुनः बम आक्रमण गरेको छ। उक्त आक्रमणमा एक पुरुषको मृत्यु भएको र स्थानीय अधिकारीका अनुसार छिमेकी मायकोलाइभ सहरमा सात जना घाइते भएका छन् भने केही घरहरू ध्वस्त भएका छन्।

शनिबार खेरसोन र डोनेस्क क्षेत्रमा रुसको आक्रमणमा परी कम्तीमा सात युक्रेनी नागरिकको मृत्यु भएको युक्रेनले जनाएको छ।

रुसी अधिकारीहरुका अनुसार, सोचीस्थित तेल प्रशोधन केन्द्रमा भएको ड्रोन आक्रमण युक्रेनले शनिबार र आइतबार गरी सञ्चालन गरेको थुप्रै ड्रोन आक्रमणमध्ये एक हो। युक्रेनी ड्रोनहरूले रियाजन, पेन्जा, र युक्रेनको सिमानासँग नजिकै पर्ने भोरोनेज शहरका संरचनाहरूलाई निशाना बनाएको जनाइएको छ। भोरोनेज क्षेत्रका गभर्नरका अनुसार एक आक्रमणमा चार जना घाइते भएका छन्।

हालसम्म युक्रेनले ती आक्रमणबारे कुनै टिप्पणी गरेको छैन। रुसले युक्रेनी विद्युत् संरचनामाथि लगातार आक्रमण गरिरहेकामा जवाफस्वरूप युक्रेनले रुसको ऊर्जा पूर्वाधारमाथि यस्ता आक्रमणहरू गर्दै आएको छ ।

रुसको रक्षा मन्त्रालयका अनुसार शनिबार राति मात्रै रुसले युक्रेनबाट पठाइएका ९३ ड्रोनमध्ये ६० ड्रोन कृष्ण सागर क्षेत्रमै खसेको दाबी गरेको छ। 

उता युक्रेनको वायु सेनाले भने, रातभर रुसले ७६ ड्रोन र ७ मिसाइल प्रक्षेपण गरेको दाबी गर्दै तीमध्ये ६१ वटा खसालिएको जनाएको छ। १६ ड्रोन र ६ मिसाइल भने आठवटा स्थानमा लागेका बताइएको छ।

#रुस युक्रेन #युद्ध रुस #युक्रेन #आक्रमण