२८ कार्तिक, विराटनगर । सहदोर मामाको हत्या गरेको आरोपमा मोरङ प्रहरीले एक युवकलाई पक्राउ गरेको छ । उर्लाबारी नगरपालिका–८ का २२ वर्षीय सुजन पाँचकोटी पक्राउ परेका हुन् ।

उनीमाथि ४२ वर्षीय मामा काजी महराको हत्या गरेको आरोप छ । आइतबार राति घरमै सुतेको बेला धारिलो हतियार (दाउ)ले टाउकोमा प्रहार गरी महराको हत्या गरिएको जिल्ला प्रहरी कार्यालय मोरङका डीएसपी दीपक श्रेष्ठले बताए ।

प्रहरीका अनुसार महरा मोरङकै पथरीशनिश्चरे नगरपालिका–१ का बासिन्दा हुन् । उनी पाँच दिनयता उर्लाबारीस्थित बहिनी कल्पना पाँचकोटीको घरमा पाहुना बस्दै आएका थिए ।

सुतेकै स्थानमा सुजनले राति ११ः४० बजेतिर आक्रमण गरेका थिए । महराको उपचारका क्रममा सोमबार बिहान १ बजेतिर मृत्यु भएको प्रहरीले जनाएको छ । प्रहरीले घटनाबारे थप अनुसन्धान गरिरहेको छ ।