टियु क्रिकेट मैदानमा पाहुना टोली आयरल्यान्ड वल्भस र नेपाल ‘ए’ बीच आजदेखि सुरु हुन लागेको तीन खेलको टि २० शृंखला अन्तर्गतको पहिलो खेल रद्द भएको छ । नेपाल क्रिकेट संघ (क्यान) ले वर्षाका कारण मैदान भिजेको हुनाले खेल रद्द भएको जानकारी दिएको छ ।

आइरिश टोलीले नेपाल ‘ए’ विरुद्ध ३ टि २० र ३ एक दिवसीय शृंखला खेल्ने तालिका रहेको छ । तर आजको खेल प्रभावित भएपछि क्यानले तालिका बदल्ने संकेत समेत गरेको छ ।

वल्भसले नेपाली सिनियर टोली विरुद्ध २ टि २० को शृंखला २ ० ले नै गुमाएको थियो । पहिलो खेलमा ६ विकेटले पराजित वल्भस दोस्रो खेलमा ७१ रनको ठूलो अन्तरले पराजित भएको थियो ।

वल्भस नेपाल भ्रमण गर्ने पहिलो आइरिश टोली समेत हो । यसअघि आयरल्यान्डको कुनै पनि टोलीले नेपालको भ्रमण गरेको छैन ।

यस्तै दुई खेलको शृंखला जितेको सिनियर टोलीको भने आज भारतको गुजरातमा हुने फ्रेन्डशिप कपको लागि विदाई भएको छ । टोलीले भारतमा गुजरात र बरोडा सम्मिलित त्रिकोणात्मक टि २० शृंखला खेल्ने छ । नेपालको पहिलो खेल ३१ मार्चमा गुजरात विरुद्ध रहनेछ ।