मध्यपुर थिमी नगरपालिकाका नगरप्रमुख मदन सुन्दर श्रेष्ठले नगरबासीको अपेक्षा र चाहाना बमोजिम कार्य गर्न नगरपालिका अहोरात्र लागि परेको बताउनुभएको छ । यो हप्ता फ्रन्टलाइन शो मा विशेष संवाद गर्दै नगरप्रमुख श्रेष्ठले नगरपालिकामा विभिन्न खालका प्रभावशाली कार्यक्रमहरु लागु भइरहेको जानकारी गराउनुभयो ।

एतिहाँसिक महत्वका विभिन्न महत्वपुर्ण सम्पदाहरुले धनि मध्यपुरमा भुकम्प र विभिन्न कारणले क्षेति पुगेका सम्पदाहरुलाई पुननिर्माण गराउने काममा नगरपालिकाको विशेष सक्रियता रहेको उहाँको भनाई छ । चालु आर्थिक वर्षभित्र लगभग सबै सम्पदाहरुले पुनर्ताजगी प्राप्त गर्ने प्रतिबद्धता प्रमुख श्रेष्ठले गर्नुभयो ।

यस्तै शहरी भुभाग बढि समेटिएको यस नगरक्षेत्रमा उत्पादित फोहोरको उचित व्यवस्थापन गर्दै जापानको नगरपालिका संग सहकार्य गर्दै नगरपालिकाले फोहोरबाट कम्पोष्ट मल उत्पादन गर्दै विक्रि समेत गर्न थालेको उहाँले जानकारी गराउनुभयो । अहिले देशका आधा दर्जन बढि नगरपालिकाहरुमा यो अभ्यास भइरहेको उहाँको भनाई छ ।

यसैगरि नगरपालिकामा कोभिड १९ को व्यवस्थापनका लागि पनि निकै प्रभावकारी प्रयासहरु भएका छन् नगरप्रमुख श्रेष्ठले भन्नुभयो, डिसियु, आइसियु र भेन्टिलेटर सहितको अस्पताल पुर्ण क्षमताका साथ संचालन भइरहेको छ । कोभिड १९ संक्रमण नियन्त्रण र व्यवस्थापनका लागि नगरपालिकामा विभिन्न जनचेतनामुलक कार्यक्रम, राहत वितरण, प्रभावकारी पिसिआर परिक्षण लगायतका कार्यमा नगरपालिका सक्रिय रहेको नगरप्रमुख श्रेष्ठले बताउनुभयो ।

संघिय राजधानीसंग जोडिएको जिल्ला भक्तपुरको केन्द्र मानिने मध्यपुर नगरपालिका विकास र समृद्धिको यात्रामा निकै सबल यात्रा गरिरहेको नगरपालिका मध्येको एक मानिन्छ ।