३ पौष, काठमाडौं । काठमाडौँको स्वयम्भुस्थित छाउनीमा ट्याक्सी चालकमाथि चक्कु प्रहार भएको छ ।

ट्याक्सीमा यात्रु बनेर चढेका बाराको कलैया बस्ने १९ वर्षीय विकास सराबले ट्याक्सी चालकमाथि चक्कु प्रहार गरेको प्रहरीले जनाएको छ ।

खुकुरी प्रहार गर्ने सराब पक्राउ परेको महानगरीय प्रहरी परिसर काठमाडौँले जनाएको छ । उनलाई शुक्रबार साँझ प्रहरीले पक्राउ गरेको हो ।

उनको चक्कु प्रहारबाट बा १ ज १४४६ नम्बरका ट्याक्सी चालक काभ्रेपलाञ्चोक जिल्लाको रोशी गाउँपलिका–२ घर भई डल्लु बस्ने ३८ वर्षीय कृष्णबहादुर लामा घाइते भएका छन् । उनको घाँटीमा चोट लागेको छ ।

सोही ट्याक्सीमा सवार सराबले शुक्रवार साँझ चक्कु प्रहार गरेका हुन् । तर के कारणले घटना घटाएका हुन् भन्ने खुलिनसकेको प्रहरीले जनाएको छ ।

घाइते लामालाई मनमोहन मेमोरियल अस्पताल स्वयम्भूमा प्रारम्भिक उपचारपछि थप उपचारका लागि ट्रमा सेन्टरमा ल्याइएको छ ।