२६ असोज, टीकापुर । लगातारको वर्षापछि आएको बाढीले कैलालीको टीकापुर नगरपालिकामा झन्डै ७०० परिवार विस्थापित भएका छन् । जानकी गाउँपालिकामा ३६ परिवार विस्थापित भएका छन् । यीमध्ये ४७ घर पूर्ण रूपमा क्षति भएको छ । विस्थापितका घरमा बाढीले क्षति पुर्‍याएपछि खानेपानी तथा शौचालयको समेत समस्या भएको छ ।

बाढी प्रभावित हुनेमा टीकापुरमा १०० बढी गर्भवती र सुत्केरी, तीन ३२० पाँच वर्षमुनिका बालबालिका, ४०० पाँच वर्षमाथिका बालबालिका, ५५ ज्येष्ठ नागरिक, २० अपांगता भएका व्यक्ति र नौ अरू बिरामी रहेका नगरपालिकाले जनाएको छ ।

बाढीका कारण नागरिक समस्यामा परेकाले विपद् व्यवस्थापन समितिको बैठकले बाढी प्रभावितको राहत तथा उद्धारका लागि प्राथमिकताका आधारमा राहत दिने निर्णय गरेको छ ।

नगरपालिकालाई बाढीपीडितका लागि तत्काल टेन्ट, त्रिपाल, खाद्यान्न, भाँडाकुँडा, खानेपानी, तयारी खाना, गुन्द्रीलगायत सामान आवश्यक पर्ने भएकाले त्यसको जोहोका लागि सरोकारवालासँग छलफल गरिएको छ ।

बाढीका कारण टीकापुर नगरपालिकाका सबै वडा प्रभावित भएका छन् । बाढीले बढी क्षति वडा नम्बर–५, ६, ७, ८ मा पुर्‍याएको छ । कर्णाली नदीमा पानीको बहाव बढेपछि कतिपय ठाउँमा नदी ‘ओभरफ्लो’ भएर बस्तीमा पसेको छ भने कतिपय ठाउँमा नदी फुटेर बस्तीमा पसेको हो । टीकापुर–८ को वनगाउँमा कर्णाली नदी फुटेर बस्तीमा पस्दा त्यहाँ ठूलो क्षति भएको छ ।

बाढीले नागरिक प्रभावित मात्र नभई धानबाली सडेर बोटमै उम्रन थालेको छ । फुल्न थालेको धान पनि सखाप भएको वडा नम्बर–८ का वडाध्यक्ष दीर्घबहादुर ठकुल्लाले बताए । “पाकेको धानबाली सबै हावा तथा पानीले ढलेर नाश भइसकेको छ ।

फुलिरहेको धान पनि डुबान तथा पटानले सकियो । नदी बस्तीमा पसेपछि धानबाली रहने त कुरै भएन,” उनी भन्छन्, “प्रभावित नागरिक राहतभन्दा पनि दीर्घकालीन समाधानको माग गर्छन् । त्यहाँ भोकमरी सुरु हुने भएको छ ।”

वडा नम्बर–५ का वडाध्यक्ष बलवीर चौधरी पनि आफ्नो वडामा धानबाली खेतमै उम्रिसकेको बताउँछन् । “अझै जलमग्न छ । धान खेतमै सडिसक्यो,” उनले भने, “घरमा पानी पस्यो, घरका सबै सामान नोक्सान भए । खेतमा रहेको धानबाली पनि सखाप भयो । हामीले कसरी स्थानीयवासीलाई सान्त्वना दिनु ?”

बाढी प्रभावितलाई नगद सहायता
कैलालीका यी दुई पालिकामा विपद् पूर्वानुमानमा आधारित बाढी पूर्वतयारी कार्यक्रमअन्तर्गत विश्व खाद्य कार्यक्रमले बाढीको जोखिममा रहेका परिवारलाई नगद सहायता गरेको छ । पूर्वानुमानमा आधारित सूचनाअनुसार गत वर्षको बाढीपछि संकलन भएको तथ्यांकका आधारमा प्रभावित क्षेत्रका नागरिकलाई प्रतिपरिवार १५ हजार रुपैयाँका दरले नगद सहायता गरिएको छ ।

विश्व खाद्य कार्यक्रमअन्तर्गत टीकापुरका दुई हजार ९१६ र जानकीका एक हजार २०० परिवारलाई नगद सहयोग प्रतिपरिवार १५ हजार रुपैयाँका दरले वितरण भइरहेको नेपाल रेडक्रस कैलालीका हेमराज उप्रेतीले जानकारी दिए ।

“प्रभावित क्षेत्रका नागरिकको खातामा नगद सहायता पठाउने काम भइरहेको छ । उहाँहरूको नाममा रकम गएको छ । रकम झिक्नका लागि हामी विभिन्न ठाउँमा सहायता कक्ष बनाएर बसिरहेका छौँ,” उनले भने, “नगद सहायता अहिले ८० प्रतिशत प्रभावितले पाउनुभएको छ । बाँकी २० प्रतिशतले एक महिनाभित्र पाइसक्नुहुनेछ ।”

जानकी गाउँपालिकाका अध्यक्ष गणेश चौधरी भन्छन्, “पालिकाले पनि प्रभावितलाई राहत, समस्या भएकालाई उद्धारजस्ता कार्य गरिरहेका छौँ,” उनले भने, “बाढीले भत्किएका बाटाघाटा मर्मतलगायत कार्य समेत भइरहेका छन् ।”

टीकापुर नगरपालिकाका प्रमुख प्रशासकीय अधिकृत मंगलबहादुर शाही यहाँ कर्णाली नदी मुख्य समस्या भएको बताउँछन् । “कर्णालीकै कारण सबै क्षेत्र डुबानमा परे । कर्णालीमा तटबन्धलगायत कार्य गरेर यसलाई बस्तीमा पस्नबाट जोगाएमा बाढीको दीर्घकालीन समस्या समाधान हुन्छ,” शाहीले भने, “प्रभावितलाई राहत दिने कुरामा प्राथमिकता हेरेर दिन्छौँ । महिला, बालबालिका, ज्येष्ठ नागरिक वा समस्यामा रहेकालाई पनि प्राथमिकता दिएर पालिकाले हेर्छ । राहत एकद्धार प्रणालीमार्फत जान्छ ।”

टीकापुरका नगरप्रमुख रामलाल डगौरा थारुले विभिन्न ठाउँमा डुबान भएको र तथ्यांक लिने काम भइरहेकाले सबैको सल्लाह लिएर जोखिमानुसार राहत दिने, समस्यामा परेकालाई उद्धार गर्ने गरी सहकार्य गर्न संघ–संस्थालाई आग्रह गरे । “सहयोगी संघ–संस्था हामीलाई आवश्यक सामग्रीमा सहयोग गर्नुहुनेछ,” उनले भने, “केही परिवारलाई नगद सहायता गएको छ । छुटेका परिवारलाई प्राथमिकता राखेर राहतका कार्यक्रम हुनेछन् ।”

उता, भजनी नगरपालिकामा भने बाढीले हजारौँ प्रभावित भएका छन् । सयौँ परिवार एक सातादेखि सडक तथा खुला ठाउँमा बसिरहेका छन् । भजनीमा भने बाढी प्रभावितको अवस्था कष्टकर छ । रासस