ग्रीसमा सवारी दुर्घटनामा ज्यान गुमाएका चार नेपालीको सनाखत
७ पुस, काठमाडौं । ग्रीसमा सवारी दुर्घटनामा परी ज्यान गुमाएका चार जना नेपालीको सनाखत भएको छ ।
गत मंसिरको पहिलो साता गैर–कानूनी रुपमा टर्की हुँदै ग्रीस प्रवेश गर्ने क्रममा गाडी दुर्घटनामा परी ज्यान गुमाएका चारै जना नेपालीको सनाखत भएको हो ।
ज्यान गुमाउनेहरुमा गौरीगंगा नगरपालिका–४ कैलालीका लक्ष्मण सापकोटा, भिमेश्वर नगरपालिका–६ दोलखाका राजु लामा, घिरिङ् गाउँपालिका–५ तनहुँका ओम बहादुर थापा र आमाछोदिङमो गाउँपालिका–३ रसुवाकी शर्मिला तामाङ भनिने रमिला घले रहेका छन् ।
नेपाली राजदूतावास भियनाका अनुसार दुर्घटना पश्चात ग्रीस प्रहरीले प्रहरीको अन्तर्राष्ट्रिय संगठन (इन्टरपोल)मा मृतकको फोटो राखेको थियो ।
नेपाल प्रहरीको मानव बेचबिखन अनुसन्धान ब्यूरोमा पुगेर मृतकका परिवारले फोटोमार्फत् शवको पहिचान गरेपछि सनाखत भएको हो ।
उक्त दुर्घटनामा घाइते भएका अन्य दुई नेपालीको अवस्था भने सामान्य रहेको बताइएको छ ।
प्रतिक्रिया दिनुहोस्