१२ माघ, काठमाडौं । नेपाल मैदा उद्योग संघले सहज रूपमा गहुँ उपलब्ध गराइदिन सरकारसँग माग गरेको छ । गहुँ अभावले करिब ८० प्रतिशत मैदा उद्योग बन्द हुने अवस्था पुगेको भन्दै संघले भारतसँग छलफल गरेर थप गहुँ उपलब्ध गराइदिन सरकारसँग आग्रह गरेको हो ।

‘पछिल्लो समयमा बजारमा गहुँ छैन, गहुँ नहुँदा करिब ८० प्रतिशत मैदा उद्योग बन्द हुने अवस्थामा पुगेका छन्,’ संघका महासचिव राधेश्याम अग्रवालले जारी गरेको विज्ञप्तीमा भनिएको छ, ‘बाँकी उद्योगहरू पनि एक हप्तामा पूर्ण बन्द हुने अवस्थामा छन् ।

मैदा उद्योगले बजारमा मैदा-आँटा दिन सक्ने अवस्थामा छैन । यस्तो परिस्थितिबाट केही हदसम्म राहत पाउन तोकिएको कोटा तुरुन्त पाउनुपर्ने देखिन्छ ।

गहुँको अभावमा मैदा-आँटाको अभाव सिर्जना भएकोले नेपाल सरकारले भारतसँग चाँडोभन्दा चाँडो कुरा गरेर थप गहुँ उपलब्ध गराइदिन अनुरोध छ ।’

भारतले २०७९ बैशाख ३० गतेदेखि गहुँ आयातमा लगाएको प्रतिबन्धका कारण बजारमा मैदा-आँटाको अभाव भएको संघको दाबी छ । मैदा- आँटा कच्चा पदार्थको रूपमा प्रयोग हुने बिस्कुट, चाउचाउ, बेकरी, तन्दुुरी-नान, भोजनालय, रेष्टुरेन्ट लगायतमा चरम अभाव रहेको संघले जनाएको छ ।

प्रतिबन्धकै कारण मैदा-आँटाको मूल्यसमेत बढेको छ । सरकारले आयातका लागि कोटा तोकेको छ । प्राप्त ५० हजार टन कोटाले सबै मैदा मिललाई करिब २० दिनसम्म मिलिङ गर्न पुग्छ ।

नेपालमा गहुँको सिजन आउन अझै ३ महिना बाँकी भएकाले भारतसँग थप गहुँ माग्नुपर्ने संघको बुझाइ छ । ‘भारत सरकारले दिएको पचास हजार मेट्रिक टन गहुँ तुरुन्त मगाउनुपर्छ ।

बाँकी ३ महिनाको लागि ३८ वटा उद्योगको लागि करिब २ लाख मेट्रिक टन गहुँ आवश्यक पर्छ,’ विज्ञप्तीमा भनिएको छ ।