३० कार्तिक, काठमाडौं । नेकपा एमालेकी नेतृ कोमल ओलीले केन्द्रीय सदस्य पदका लागि उम्मेदवारी घोषणा गरेकी छन् । चितवनको नारायणी किनारमा आगामी मंसिर १० गतेदेखि हुने एमालेको राष्ट्रिय महाधिवेशनमा केन्द्रीय सदस्यका लागि उठ्ने ओलीले जानकारी गराएकी छन् । 

एमालेले नेतृत्व चयनका लागि महाधिवेशन गर्दैछ । असोज तेस्रो साता ललितपुरको गोदावरीमा एमालेले विधान महाधिवेशन सम्पन्न गरिसकेको छ । चितवनमा हुन लागेको महाधिवेशन नेतृत्व चयनमा मात्रै केन्द्रीत हुने एमालेले जनाएको छ । 

एमाले महाधिवेशन नजिकिँदै जाँदा नेताहरूले आ–आफ्नो उम्मेदवारी घोषणा गर्न थालेका छन् । यसैबीच ओलीले आफू केन्द्रीय सदस्य पदका लागि उम्मेदवार बन्न लागेको बताइन् । 

रेडियो नेपालको जागिर छाडेर ०७३ सालदेखि राजनीतिमा सक्रिय भएकी ओली राष्ट्रियसभा सदस्य पनि हुन् । तत्कालिन नेकपाबाट राष्ट्रियसभा सदस्यमा निर्वाचित भएकी उनी पूर्वप्रधानमन्त्री तथा एमाले अध्यक्ष केपी शर्मा ओलीनिकट मानिन्छिन् । 

दाङ स्थायी घर भएकी उनी गत निर्वाचनदेखि एमालेमा सक्रिय भएर लागेकी हुन् । ओली लुम्बिनी प्रदेशबाट राष्ट्रियसभा सदस्य निर्वाचित भएकी थिइन् ।