ऊर्जामन्त्री दीपक खड्काले नेपाल विद्युत् प्राधिकरणको केन्द्रीय कार्यालय रत्नपार्कमा आफ्नो कार्यकक्ष बनाउन थालेका छन् । 

मंगलबार ऊर्जा मन्त्रालयका कर्मचारी गएर प्राधिकरणमा कोठाको निरीक्षण गरेका थिए । लगत्तै बेलुकाबाट मन्त्रीको कार्यकक्ष बनाउन थालिएको हो । यसअघि मन्त्रीका लागि प्राधिकरणका कार्यकक्ष थिएन भने मातहतका कार्यालयका कार्यकक्ष बनाउने अभ्यास पनि कुनै मन्त्रालयका छैन । 

प्राधिकरणको ४० वर्षे इतिहासमा कुनै मन्त्रीले आफैँले कार्यकक्ष बनाएको यो पहिलो पटक हो । 

मन्त्रीले आफ्नो कार्यकक्ष बनाइरहेका बेला प्राधिकरणका कार्यकारी निर्देशक कुलमान घिसिङ माथिल्लो तामाकोसीको मर्मत सम्भारमा गएका छन् । प्राधिकरणका प्रमुखको अनुपस्थितमा मन्त्रालयका कर्मचारीले कार्यकक्ष तयार पार्न थालेका छन् । 

त्यसो त प्राधिकरण सञ्चालक समितिको अध्यक्ष ऊर्जामन्त्री हुन्छन् । मन्त्रीको कार्यकक्ष आवश्यक ठानेमा प्राधिकरणले बनाउने हो । स्रोत भन्छ, ‘मन्त्री आफैँले आफ्नो लागि मातहतका निकायमा कार्यकक्ष बनाएको नौलो अभ्यास देखियो । यो कामको लागिभन्दा प्राधिकरण प्रमुख घिसिङलाई अप्ठ्यारो पार्न र उहाँको कामका अवरोध गर्नका लागि बनाएको जस्तो देखिन्छ ।’ 

यसै पनि डेडिकेटड र ट्रंकलाइनको महसुल उठाउने विषयमा प्राधिकरण र मन्त्रालयबिच कुरा मिलेको छैन । जसका कारण मन्त्री र कार्यकारी निर्देशकबिच तनाव बढ्दै गएको छ । 

 प्राधिकरणको नेतृत्व जसरी हुन्छ बक्यौता उठाउने पक्षमा छ भने मन्त्रालय समितिमाथि समिति बनाएर बक्यौता उठाउने काममा अप्ठ्यारो बनाउन थालेको छ ।  

यसअघि ऊर्जामन्त्रीले घिसिङलाई ब्यालेन्स गर्न ऊर्जा विज्ञको रुपमा प्रबल अधिकारीलाई मन्त्रालयमा ल्याएका थिए ।