२१ पुस, चेन्नइ  । कुकुरको टोकाइबाट एक ९ वर्षीया बालिका घाइते भएपछि कुकुर मालिकलाई प्रहरीले गिरफ्तर गरेको छ।

घटना लगत्तै उजुरी परेपछि नोलाम्बुर प्रहरीले कुकुरका मालिकविरुद्ध मुद्दा दर्ता गरेको थियो। मुद्दा दर्ता लगत्तै प्रहरीले कुकुरका मालिक विजयलक्ष्मीलाई पक्राउ गरेको हो।

कुकुरले बालिकालाई टोक्दै गरेको भिडियो सामाजिक सञ्जालमा भाइरल भएपछि कुकुर मालिकलाई गिरफ्तार गरिएको हो।

समाचारमा बताइएअनुसार कुकुरले ती बालिकालाई लखेट्दै १६ पटक टोकेको थियो।

बालिका आफ्नो घरको आँगनमा खेलिरहेको अवस्थामा कुकुरले आक्रमण गरेको हो। बालिका खेलिरहेको अवस्थामा कुकुरको मालिक्नी कुकुरलाई डोर्‍याउँदै थिइन्। त्यही क्रममा कुकुरले बालिकामाथि आक्रमण गरेको थियो।

यो घटना प्रहरीले चेन्नईको नोलाम्बुरमा भएको बताएको छ । कुकुरले पछ्याउन थालेपछि उनी निकै डराएर भाग्न खोज्दा चिप्लिएर लडेकी थिइन्।

त्यसपछि कुकुरले उनलाई टोक्न थालेको थियो। यो देखेर त्यहाँ वरपर रहेका मानिसहरु बालिकालाई तुरुन्तै अस्पताल लगेका थिए।