विशेष महाधिवेशन हुने बेला मेरो धारणा अलि फरक थियो। यदि निर्वाचन हुने हो भने निर्वाचनमा जाऔँ। निर्वाचनमा शेरबहादुर देउवाको सही हुने टिकटमा अर्को विकल्पमा जाऔँ, गगन थापालाई प्रधानमन्त्री घोषणा गरौँ र अधिवेशन पछि गरौँ भन्ने पक्षमा थिएँ।

तर निर्वाचन आयोगले निर्णय गरेपछि मेरो धारणा स्पष्ट भयो। रुख र चारतारे झण्डा जहाँ छ, हामी त्यहीँ हुनुपर्छ भन्ने मेरो मान्यता हो।

म लामो समयदेखि पार्टीमा काम गरिरहेको मान्छे हुँ। नेताहरूसँग विचार मिल्न सक्छ, कसैसँग नजिक हुन सकिन्छ। तर अन्ततः पार्टीको आधिकारिक पहिचान र चुनाव चिह्नको महत्त्व हुन्छ। कांग्रेस फुटेर बनेका समूहहरूको इतिहास हामीले देखेका छौँ। नदीका भँगाला छुट्टिए भने कि मूल नदीमा मिसिन्छन्, कि बीचमै सुक्छन् भन्ने मैले पहिले पनि भनेको थिएँ। कांग्रेसका भँगाला छुट्टिएर फेरि सुक्ने अवस्था नआओस् भन्ने मेरो चाहना हो।