काठमाडौँ । नेपाली कांग्रेसको १५ औँ महाधिवेशन कार्यतालिका स्थगन माग गरिएको रिट कामु प्रधानन्यायाधीश सपना प्रधान मल्ल र न्यायाधीश मेघराज पोखरेलको इजलासमा पेशी तोकिएको छ । १४ औँ महाधिवेशनबाट सभापतिमा निर्वाचित शेरबहादुर देउवा र नेता पूर्णबहादुर खड्काले वारेसमार्फत दायर गरेको रिट मल्लको इजलासमा पेसी तोकिएको हो । 

देउवा र खड्काले पार्टीको आधिकारिकता विवाद नटुंगिँदासम्म १५ औं महाधिवेशनको नयाँ कार्यतालिका कार्यान्वयन नगर्न माग गर्दै सर्वोच्च अदालतमा वारेसमार्फत चैत २५ गते रिट दायर गरेका हुन् । 

वारेस श्रवणकुमार श्रेष्ठले दायर गरेको रिटमा तत्कालीन महामन्त्रीद्वय गगन थापा र विश्वप्रकाश शर्माको अगुवाइमा सभापति देउवाको असहमतिका बीच विशेष महाधिवेशन गरेर चयन गरिएको नयाँ कार्यसमिति चयनलाई कांग्रेसको विधानविपरीत निर्वाचन आयोगले अद्यावधिक गरेको उल्लेख गरिएको छ ।

आयोगको निर्णयविरुद्ध पार्टीको आधिकारिकता माग गर्दै सर्वोच्चमा दायर रिट विचाराधीन रहेको भन्दै त्यो रिटको फैसला नहुँदासम्म महाधिवेशनको प्रक्रिया स्थगन गर्न रिटमा माग गरिएको छ ।