कल्याणकारी कोषमा अनियमितता: पूर्वप्रमुख सेनानीविरुद्ध डिफ्युजन नोटिस जारी गर्ने तयारी
अदालतमा मुद्दा दर्ता भएर फरार रहेका अधिकारी देश बाहिर रहेको भन्दै पक्राउका लागि प्रहरीको अन्तर्राष्ट्रिय संगठन इन्टरपोलमार्फत डिफ्युजन नोटिस जारी गर्न लागिएको हो । यसका लागि नेपाली सेनाले समेत कागजात लेखेर जिल्ला प्रहरी परिसर काठमाडौंमा पठाइसकेको छ ।
News Summary
Generated by OK AI. Editorially reviewed.
- नेपाली सेनाका पूर्वप्रमुख सेनानी लक्ष्मण अधिकारीविरुद्ध डिफ्युजन नोटिस जारी गर्न प्रक्रिया अघि बढाइएको छ ।
- सैनिक घोटालाको मुद्दामा पक्राउ परेका व्यक्तिहरूलाई अन्तर्राष्ट्रिय संगठन इन्टरपोलमार्फत पक्राउ गर्न तयारी भइरहेको छ।
- यस घोटालामा पूर्वजमदार आत्मराम थापा कारागार चलान भएका छन् र अन्य आरोपितहरूको हकमा आन्तरिक छानबिन भइरहेको छ।
३१ वैशाख, काठमाडौं । सैनिक कल्याणकारी कोषको दुई करोड रुपैयाँ घोटाला प्रकरणमा फरार रहेका नेपाली सेनाका पूर्वप्रमुख सेनानी लक्ष्मण अधिकारीविरुद्ध डिफ्युजन नोटिसको प्रक्रिया अघि बढाइएको छ ।
अदालतमा मुद्दा दर्ता भएर फरार रहेका अधिकारी देश बाहिर रहेको भन्दै पक्राउका लागि प्रहरीको अन्तर्राष्ट्रिय संगठन इन्टरपोलमार्फत डिफ्युजन नोटिस जारी गर्न लागिएको हो । यसका लागि नेपाली सेनाले समेत कागजात लेखेर जिल्ला प्रहरी परिसर काठमाडौंमा पठाइसकेको छ ।
‘सैनिक ऐनले आकर्षित नहुनेको हकमा सबै अनुसन्धान र मुद्दाको कारबाही प्रहरीले नै गर्ने भयो । यो विषय हामीबाट प्रहरी कहाँ गइसकेको हो । अब बाँकी काम प्रहरीले नै गर्ला,’ सैनिक प्रवक्ता सहायक रथी गौरव केसीले अनलाइनखबरसँग भने ।
अब जिल्ला प्रहरी परिसर काठमाडौंले अदालतमा दर्ताको मुद्दाको विवरणसहितका कागजात तयार पारेर प्रहरी प्रधान कार्यालयको नेसनल सेन्ट्रेल ब्यूरो (एनसीबी) लाई पत्र लेख्नेछ । त्यसपछि बल्ल एनसीबी काठमाडौंले इन्टरपोललाई पत्राचार गरेपछि नोटिस जारी हुनेछ ।
यही घोटाला प्रकरणमा यसअघि मुद्दा चलेर २८ वैशाखमा सेनाका पूर्वजमदार आत्मराम थापा कारागार चलान भएका थिए ।
काठमाडौं जिल्ला अदालतका न्यायाधीश दिवाकर भट्टको इजलासले पुर्पक्षका लागि थापालाई कारागार चलानको आदेश दिएको थियो ।
बहालवाला सहायक रथी रोशन खड्का र बहालवाला सेनानी बोधराज कार्कीसमेतको मिलेमतोमा सैनिक कल्याणकारी निर्देशनालय अन्तर्गतको आवास तथा बीमा शाखाबाट २ करोड २१ लाख ८५ हजार ५१५ रुपैयाँ घोटाला भएको थियो ।
पक्राउ परेका आरोपित थापाले सहायक रथी खड्का र सेनानी कार्कीको नाम लिएका थिए । उनीहरूको हकमा भने आन्तरिक छानबिन भइरहेको सेनाले बताएको छ ।
प्रतिक्रिया दिनुहोस्