२६ साउन, रामेछाप  । जिल्लाको उमाकुण्ड गाउँपालिकाका एक वडा सचिवलाई प्रहरीले नियन्त्रणमा लिएको छ।

नागरिकता लिइसकेकी किशोरीलाई पुन: नागरिकता लिन वडाबाट दोहोरो सिफारिस गर्ने उमाकुण्डा गाउँपालिका- ४ प्रितीका वडा सचिवलाई प्रहरीले नियन्त्रणमा लिएको हो । 

बुधबार जिल्ला प्रहरी कार्यालय रामेछापले वडा सचिव पदम कुमारी बस्नेतलाई नियन्त्रणमा लिएको जिल्ला प्रहरी कार्यालय रामेछापका प्रहरी नायब उपरीक्षक राजकुमार थिङ्ले  जानकारी दिए । डीएसपी थिङका अनुसार  नियन्त्रणमा लिएर अनुसन्धान भइरहेको छ । 

जिल्लाको उमाकुण्ड गाउँपालिका- ४ प्रितीकी एकजना किशोरीले २०७५ सालमै नागरिकता बनाइसकेकी थिइन् । तर, उनी पुन: नागरिकता बनाउन सिफारिस लिएर जिल्ला प्रसासन कार्यालय रामेछाप आएकी थिइन् । 

बहिनीको स्कुलको प्रमाणपत्रको आधारमा सिफारिस बनाएर उनी जिल्ला प्रशासन आइपुगेकी थिइन् ।

प्रशासन कार्यालय पुगेकी निर्माला बस्नेतमाथि प्रशासनका कार्मचारीले शंका लागेर उनीमाथि थप सोधपुछ गरेका थिए।  

सोधपुछका क्रममा किशोरीको डकुमेन्ट प्वाल परेको र नाम भएको ठाउँमा केरमेट गरेको भेटिएको थियो ।

वडा सचीव पदमकुमारी बस्नेतलाई बिहीबार नै जिल्ला अदालत रामेछापबाट म्याद थप गरी अनुसन्धान प्रक्रिया अगाडि बढाइएको जिल्ला प्रहरी कार्यालय रामेछापका सूचना अधिकारी राजुप्रसाद ढकालले जानकारी दिए ।