अमेरिकी राष्ट्रपति डोनाल्ड ट्रम्पले अस्थायी युद्धविराम सम्झौता ‘सकिएको’ घोषणा गरेयता अमेरिकी सेनाले इरानमाथि लगातार सातौँ रात पनि भीषण आक्रमण गरेको छ।

अमेरिकी सैन्य सेन्ट्रल कमान्ड (सेन्टकम) ले एक विज्ञप्ति जारी गर्दै राष्ट्रपतिको निर्देशनमा इरानी सैन्य क्षमतालाई कमजोर बनाउने उद्देश्यले यी हवाई आक्रमणहरू गरिएको जनाएको छ। ह्वाइट हाउसका प्रवक्ताका अनुसार अमेरिकाले इरानको ‘सैन्य बन्दोबस्तीका पूर्वाधार’ (मिलिटरी लजिस्टिक इन्फ्रास्ट्रक्चर) सहित पूर्ण रूपमा सैन्य लक्ष्यहरूमा मात्रै आक्रमण केन्द्रित गरेको दाबी गरेको छ।  

इरानी सञ्चारमाध्यमहरूका अनुसार केन्द्रीय सहर याज्द, केस टापु र रणनीतिक रूपमा महत्त्वपूर्ण बन्दर अब्बास बन्दरगाह नजिकै ठुला विस्फोटका आवाजहरू सुनिएका छन्। प्रभावित क्षेत्र होर्मोज्गान प्रान्तका अधिकारीहरूले यी आक्रमणहरूमा परी कम्तीमा सात जनाको मृत्यु भएको जनाएका छन्।

इरानले आफ्ना पुल, रेल्वे स्टेसन र विमानस्थल जस्ता नागरिक पूर्वाधारहरूमा अमेरिकी सेनाले आक्रमण गरेको आरोप लगाए पनि वासिङ्टनले भने उक्त दाबीलाई अस्वीकार गरेको छ।  यसैबिच, ‘बीबीसी भेरिफाइ’ र ‘बीबीसी पर्सियन’ ले इरानको ‘गारिवे पुल’ मा भएको क्षतिको भिडिओ फुटेज प्रमाणित गरेका छन्। रात्रिकालीन भिडिओहरूमा उक्त पुलमा आगोको ठुलो ज्वाला देखिएको छ भने दिउँसोको तस्बिरमा भत्किएको पुल वरपरको सडक खण्ड क्षतविक्षत भएको देखिन्छ।

यसैबिच, इरानको रिभोलुसनरी गार्ड्स (आईआरजीसी) ले होर्मुज जलडमरूमध्येको माइन बिछ्याइएको समुद्री मार्गबाट पार हुने क्रममा दुईवटा तेल ट्याङ्कर विस्फोट भएको दाबी गरेको छ। तर, अमेरिकी सैन्य कमान्ड सेन्टकमले उक्त दाबीलाई पूर्ण रूपमा ‘झूटो’ भन्दै खण्डन गरेको छ।  

अमेरिका र इरानबिच भइरहेको लगातारको प्रतिशोधपूर्ण आक्रमणका कारण विश्वकै महत्त्वपूर्ण जलमार्ग मानिने हर्मुज जलडमरूमध्येको पारवहन यातायात यतिबेला ठप्प भएको छ। सामान्य अवस्थामा विश्वको कुल तेल र तरल प्राकृतिक ग्यास (एलएनजी) आपूर्तिमध्ये झन्डै पाँच भागको एक भाग यही मार्ग भएर ओसारपसार हुने गर्दछ।  

यसअघि शुक्रबार इरानी सशस्त्र बलले कुवेत, बहराइन, जोर्डन र सिरियामा रहेका विभिन्न अमेरिकी सैन्य ठेगानाहरूमा आक्रमण गरेको दाबी गरेको थियो, जसलाई अमेरिकाले अस्वीकार गरिसकेको छ। यद्यपि, कुवेती अधिकारीहरूले इरानी ड्रोन आक्रमणमा आफ्ना केही सैनिक घाइते भएको र एउटा विद्युत गृह तथा पानी प्रशोधन केन्द्रमा क्षति पुगेको पुष्टि गरेका छन्। 

त्यस्तै, गत हप्ता जोर्डनका दुईवटा आधार शिविरमा भएका इरानी आक्रमणका क्रममा धेरै अमेरिकी सैनिकहरू घाइते भएको अन्तर्राष्ट्रिय सञ्चारमाध्यमहरूले उल्लेख गरेका छन्।  होर्मुज जलडमरूमध्येको भविष्यलाई लिएर बढेको विवादका कारण स्थायी युद्धविराम गराउने प्रयासहरू असफल भएसँगै इरानसँगको शान्ति वार्ता भङ्ग भएको एक हप्ता पुगेको छ। सोही अवधि देखि अमेरिकाले इरानमाथि हरेक रात शृङ्खलाबद्धरुपमा आक्रमणहरू जारी राखेको छ।