२२ चैत, काठमाडौं । दक्षिण कोरियाका राष्ट्रपति युन सुक योलमाथिको महाभियोग संवैधानिक अदालतले पनि सदर गरेको छ । यससँगै उनी पदमा फर्किने बाटो बन्द भएको छ ।

संवैधानिक अदालतले सर्वसम्मतिले संसदबाट पारित भएको महाभियोगलाई अनुमोदन गर्दै उनलाई पदच्युत गरिदिएको हो ।

युनले केही समयअघि मार्शल लको घोषणा गरेका थिए । उनले उत्तर कोरियाबाट खतरा र राजनीतिक गतिरोधलाई कारण देखाउँदै मार्शल ल लागू गरेपछि विरोध भएको थियो । त्यसकै कारण उनीमाथि महाअभियोग लगाइएको थियो ।

योललाई महाअभियोग लागेपछि त्यहाँका प्रधानमन्त्री हान डक-सू कार्यवाहक राष्ट्रपति बनेका छन् । उनलाई पनि महाअभियोग लगाइएको थियो । तर, उनको महाअभियोग अदालतले खारेज गरिदिएको थियो ।

युन सुक योल पदमुक्त हुने दोस्रो दक्षिण कोरियाली राष्ट्रपति हुन्, यसअघि सन् २०१७ मा पार्क ग्युन-हे पनि महाभियोगपछि पदच्युत भएका थिए।

अदालतको निर्णय अनुसार, अब ६० दिनभित्र कोरियामा नयाँ राष्ट्रपति चयनका लागि निर्वाचन गर्नुपर्नेछ ।

दक्षिण कोरिया