काठमाडौँ महानगरपालिकाका मेयर बालेन साहको एउटा तस्बिर यतिबेला सामाजिक सञ्जालमा भाइरल छ । ‘बाथ टावेल’ पहिरिएका उनले एक युवतीलाई अंगालो हालेर फोटोको लागि पोज दिएको देखिन्छ । यद्यपि,अंगालोमै पोज दिएकी ती युवती बालेनकी श्रीमती भने होइनन् ।

महानगर प्रवक्तासमेत रहेका १७ नम्बरका वडाध्यक्ष नवीन मानन्धरले केही दिनअघि एक टेलिभिजन अन्तर्वार्तामा उक्त तस्बिर देखाउँदै बालेनको कार्यशैलीमाथि प्रश्न उठाएका थिए । महानगरका जनप्रतिनिधि र कर्मचारीसँग समन्वय गर्न समय नहुने, तर बाहिर ‘मस्त मनोरञ्जन’ गर्दै हिँड्न पर्याप्त समय हुने मानन्धरको आशय थियो । 

उक्त अन्तर्वार्तापछि बालेनले मानन्धरलाई स्पष्टीकरण सोधिसकेका छन् । पत्रमा बालेनले मानन्धरलाई माफी माग्न निर्देशनयुक्त चेतावनीसमेत दिएका छन् । यद्यपि,मानन्धरले हिजै जनआस्थासँगको कुराकानीमा बालेनसँग माफी नमाग्ने तर साथीहरुसँग छलफल गरेर जवाफ बुझाउने बताइसकेका छन् ।

त्यसो त, बालेन आफैं प्रधानमन्त्री केपी शर्मा ओलीमाथि विभिन्न कटाक्ष र आरोप लगाउने पात्र हुन् । आफूलाई जथाभावी बोल्न छुट दिएका बालेनले केही आरोप लगाउँदैमा प्रवक्ता मानन्धरलाई स्पष्टीरकण सोधिहाल्नुपर्ने कारण के होला ? भन्ने प्रश्नमा स्रोत भन्छ, ‘त्यही युवतीसँगको तस्बिर हो, प्रवक्ताज्यूले टिभिमार्फत् देखाएपछि मेयरसाप अलि आत्तिएजस्तो देखियो, रिसाएको जस्तो पनि देखियो, त्यसपछि स्पष्टीकरण सोधिएको हो ।’

महानगरका जनप्रतिनिधि र कर्मचारीसँग समन्वय गर्न समय नहुने, तर बाहिर ‘मस्त मनोरञ्जन’ गर्दै हिँड्न पर्याप्त समय हुने मानन्धरको आशय थियो ।

उसो भए मानन्धरले सार्वजनिक गरेको युवतीसहितको तस्बिरको वास्तविकता के हो त ? भन्ने अर्काे प्रश्नमा स्रोत खुलाउँछ, ‘ती युवती को हुन्, विस्तारै खुल्दै जाला । तर जुन अवस्थामा तस्बिर लिइएको छ, त्यसले अनेक अर्थ लाग्ने देखिन्छ । बाथरुमको वान पिसमा त्यो पनि पछाडि बार (मदिरालय) लाई के भन्ने ?’

अर्को स्रोतले भने तस्बिरमा बालेनसँग देखिएकी युवती ‘डिजे पिज्जा’ भएको जानकारी दिएको छ । स्रोतका अनुसार ती युवतीको वास्तविक नाम ज्यास्मिन खनाल हो । बुटवलकी उनी विभिन्न रेष्टुरेण्ट, लाउन्ज, बार र नाइट क्लबहरुमा डिजेको काम गर्छिन् । त्यस्तै, कन्सर्टहरुमा पनि उनले प्रस्तुती दिने गरेको बताइन्छ । 

बालेन पढाइले इञ्जिनियर र शौखमा र्यापर हुन् । २०७९ को स्थानीय तहको निर्वाचनमा काठमाडौँ महानगरको मेयर निर्वाचित भइसकेपछि पनि ‘नेपहपको श्रीपेच’मा निर्णायकको भूमिमा देखिनुले बालेनमा र्यापरको गुणा हावी स्वतः देखिन्छ । उक्त रियालिटी शोमा बालेन निर्णायकको भूमिकामा भएकै बेला ती युवतीसँग भेट भएको स्रोतको दाबी छ । ‘फोटोमा दुई जनाबीच देखिएको सामिप्यतालाई आधार मान्ने हो भने शंका गर्ने ठाउँ धेरै छन्, तर यसैलाई निष्कर्ष मानिहाल्नु हुँदैन’, स्रोतले अन्तमा भन्यो, ‘जय शम्भो ।’