हात्तीपाइले विरुद्धको औषधि खुवाउन स्वास्थ्यकर्मीसँगै खटिए जनप्रतिनिधि
दाङ । फागुन ११ गतेयता देशभर हात्तीपाइलेविरुद्धको औषधि खुवाउने अभियान चलिरहेको छ ।
विगतमा वर्षमा स्वास्थ्यकर्मी र स्वयंसेविकाले खुवाउँदै आएको हात्तीपाइल विरुद्धको औषधि सेवन अभियानमा यसपटक भने जनप्रतिनिधि पनि सहभागी भएका छन् ।
प्रदेशका दाङ, बाँके र कपिलवस्तुमा हात्तीपाइलेविरुद्धको औषधि खुवाउन स्वास्थ्यकर्मीसँगै जनप्रतिनिधि पनि घर-घरमा पुगिरहेका छन् । औषधि सेवनमा अभियानमा वडाका अध्यक्षदेखि सदस्य नियमित जसो स्वास्थ्यकर्मीसँगै गाउँ बस्ती गइरहेका छन् ।
‘हात्तीपाइले औषधिबारे फैलिएको भ्रमहरुले औषधि खुवाउँन समस्या थियो’ दाङ तुलसीपुर उपमहानगरपालिका जनस्वास्थ्य प्रबर्द्धन महाशाखाका जनस्वास्थ्य निरीक्षक विमल केसी भन्छन्, ‘यसपालि जनप्रतिनिधिलाई पनि स्वास्थ्यकर्मीसँगै हिडाएर औषधि खुवाउन लागेका छौं ।’
लुम्बिनी प्रदेशका तीन जिल्लामा हात्तीपाइले रोगको जोखिम मानिन्छ । ६ वर्षभित्रै रोग उन्मुलन गर्ने लक्ष्य राखिए पनि दाङ र बाँकेमा १३ वर्ष र कपिलबस्तुमा १५ वर्षसम्म पनि उन्मुलन हुन सकेको छैन ।
कुल जनसंख्याको ८० प्रतिशत जनसंख्याले औषधि सेवन नगर्दा अभियान प्रभावकारी हुन सकेको थिएन । जसकारण १५ वर्षसम्म पनि जिल्लामा पनि औषधि सेवन अभियान चलिरहेको छ ।
अहिले बाँके र दाङमा हात्तीपाइलेको संक्रमणको दर ४ प्रतिशतमा झरेको छ भने कपिलवस्तुमा ८.३९ प्रतिशत छ ।
साढे १९ लाखलाई औषधि खुवाइँदै
प्रदेशका दाङ, बाँके र कपिलवस्तुमा फागुन ११ गते खुवाउँन लागिएको हात्तीपाइलेविरुद्धको औषधि सेवन अभियान फागुन मसान्तसम्म चल्नेछ । यो वर्ष यी तीन जिल्लामा गरी साढे १९ लाख बढीलाई औषधि खुवाइँदैछ ।
दाङमा ६ लाख ८७ हजार, बाँकेमा ६ लाख १६ हजार र कपिलवस्तुमा ६ लाख ४२ हजार जनसंख्यालाई औषधि खुवाउने लक्ष्य राखिएको छ ।
जिल्लाका सबै स्थानीय तह मार्फत घर-घरमा स्वाथ्यकर्मी खटाएर औषधि सेवन भइरहेको स्वास्थ्य कार्यालय कपिलवस्तुका जनस्वास्थ्य अधिकृत उमेशचन्द्र घिमिरेले बताए ।
पोथी लामखुट्टेको टोकाइबाट मानिसको शरीरमा पस्ने फाइलेरिया नामक परजीवीका कारण हात्तीपाइले रोग लाग्ने गर्दछ ।
प्रतिक्रिया दिनुहोस्