रुसबाट कच्चा तेल नकिन्न भारतलाई दबाब दिने अमेरिका आफैले रुससँग डिजेल खरिद सुरु गरेको छ । अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच १० अक्टोबरमा ९० मिनेट लामो टेलिफोन वार्तापछि यो घटना विकास भएको हो । ट्रम्पले रुसबाट डिजेल आयातको सहमति गरेर अमेरिकी बजारमा चर्को मूल्यवृद्धिलाई नियन्त्रण गर्न खोजेका छन् । यसबाट उनले आउन लागेको चुनावमा आफ्नो दल रिपब्लिकनलाई बलियो बनाउन खोजेका छन् ।

ट्रम्पले पुटिनसँग नयाँ सहमति बनाएलगत्तै युक्रेनले नयाँ राष्ट्रपति पाउनुपर्ने समय भइसकेको बताएर तरङ्ग ल्याइदिएका छन् विश्व राजनीतिमा । युद्ध अन्तको सहमति निकाल्ने नयाँ नेता आउनुपर्नेमा उनको जोड छ । यो घटनाले जेलेन्स्कीलाई ठूलो झड्का परेको छ ।
 
जेलेन्स्की नेतृत्वको युक्रेन रुससँगको युद्धमा निकै खस्किइसकेको छ । दसौँ हजारको ज्यान गइसकेको छ । दसौँ अर्ब डलर क्षति पुगेको छ । रुसले जति गुमाएको छ त्यो भन्दा कैयौँ गुणा युक्रेनले गुमाइसकेको छ । चार वर्ष लामो युद्धका क्रममा युक्रेनले ठूलो भू–भाग गुमाइसकेको छ । युद्ध अन्त भएपछि उसले पुगेको क्षति र गुमेको भूभाग प्राप्त गर्ने सम्भावना न्यून छ । 

अहिले आएर ज–जस्ले युक्रेनलाई साथ दिएका थिए तिनले साथ छाड्दै गएका छन् । अमेरिकाले त साथ मात्र छाड्दै छैन उल्टै रुससँग डिजेल खरिदको नयाँ सम्झौता गरेको छ । अमेरिका आफ्नो स्वार्थमा युद्ध र शान्तिका सम्झौता जुनसुकैबेला गर्न तयार हुन्छ भन्ने सन्देश समेत दिएको छ ।